散文貴在真一字，真寫來自然真實有內容，當然道有才情吸引人。陳金順先生這本散文集《賴和價值一千箍》誠是：篇篇真情，親情、友情、文學情、國家情唯紙裡湧出來，而且，篇章語文形式優美。
　　佇今年五月底，接著陳金順電子批，請我寫一篇序，六月初收著散文稿。當時，我是佇咧車禍骨折的復原期的第八個月，攏無去上班。佇厝裡，一日作兩擺物理復健，治療疼痛勼縮的肌肉筋路，期待早日佫再雙腳踏地，家己自然行路。佇復健空縫裡，讀陳金順的優美散文，互我心情開朗，那像物理復健，有療傷之效。
　　我一面看，一面作筆記。就筆記簿的資料，揀揀咧，整理理咧，用「作家、作品、讀者」的三款面向來寫序。「作家」本身的「思維」催生「作品」，在「作品」產生的過程，常常會發生：寫出來的佈局有時參「作家」構思的拄好相反。顯示「作品」有伊的社會生命，透過作家的筆無形中出現。一部有血有肉有目屎的文學作品，一抱民族史詩，大概就是民族生命的「思維」的結晶。「作品」的另外一個狀態，就是「思維」的中途站，提供「讀者」的介入。每個「讀者」有伊的感受，有時陣，「讀者」對著「作品」再「思維」，產生作家本身無經歷、無構思的境界，就是「讀者」對「作品」有藝術再創作的機能。若是用作家、作品、讀者這三個面向切入去，文學可以看作是一款引發「思維交流」的藝術。道是講：「作家」是第一度思維空間，作家的「作品」是第二度思維空間，「讀者」構成第三度思維空間。我就欲用「三度思維空間」的觀點，來講寡這本散文集的真情及優美。
　　代先，唯讀者這度思維空間切入去，先作一個高空巡禮。
　　這本散文集分作四輯。第一輯【淡薄仔春光】有五個篇章，第一篇道是〈淡薄仔春光〉。第三篇是〈賴和價值一千箍〉，作者用來作這本散文集的書名。其他三篇是：〈行入光景〉、〈鹽埕明興路〉、〈焚茶煮詩配月光〉。第一輯的特色是文學光景。陳金順作一位文學作家佮文友來往誠捷，這五篇道是咧記述台語文學路頂的痕跡，唯北台灣伊生長的所在往南台灣移徙的光景。有中部的鹿港行，有彰化的賴和文學館，有南國歷史行踏，有南瀛文學的痕影，有影處處有淡薄仔春光。這款台語文學活動的生活散文誠少，掠落來作歷史見證誠有價值。
　　第二輯【阿媽】有四篇：〈阿媽〉、〈老師妳好〉、〈楊梅山頂冷風寒〉、〈臨時俳優導演夢〉。阿媽晟伊大漢，老師照顧伊國中及高中的成長期，楊梅是伊做兵的所在，導演夢追記伊的藝專生活。這輯拄好是陳金順的夠二十統歲成長史的切片，切了誠成功。寫阿媽的恩情，寫老師的愛心，篇篇打動讀者的心肝窟仔。
　　第三輯【雨水滴落黃金城】有五篇，篇篇攏咧寫遊風景區，途中拄著的人文景觀。有山頂的楓仔葉，有海墘的紅樹林，有南台灣風景線，有登山練腳力，有山區金礦博物館。每篇長短不一，長有長的寫法，短有短的筆法。親像〈挖仔尾看紅樹林〉誠短，那像一幅速寫圖，報人知某地有一項寶，欲深入觀賞，請恁家己行一逗。上尾即篇〈雨水滴落黃金城〉是咧寫遊九份的黃金博物館，歸篇雨水唯頭滴夠尾，雨中的景緻，雨裡的朋友情，家己的心情，攏寫甲足活。
　　第四輯【純情年代】篇章數目上濟，總共有八篇。參頂頭三輯無共款，這輯是有台灣歷史及社會的痕影，顯示作者對台灣社會歷史的關懷面及參與。親像第一篇〈純情年代〉是以二二八作背景，描寫青年男女的戀情。第二篇〈奧巴桑e無期徒刑〉寫二二八事件導火線的婦人人林江邁，筆法嘛誠新巧。第三篇〈彼年e聖誕暝遐呢長〉是作者親身的經歷，參與反抗國民黨政權佇九十年代抄地下電台的惡行，對伊行落社會運動有誠幼的素描。第四篇〈萬古安寧〉是追悼亡友，記林萬寧生前參作者作伙行過的路，有社會、教師、台灣語文、獨立建國等等的運動。
　　第五篇〈1999春天紀事〉嘛是歷史，有二二八紀念會，鄭南榕自焚十週年追思會，配一帖文學紀事。第六篇〈春天雨水滴〉記正月裡，文友作陣行踏鄉野，追尋「噍吧哖事件」腳跡，順筆講著：「鴨母王朱一貴革命」、春天雨水一直滴的「二二八事變」。第七篇〈古意e台灣運將〉記一個社會小人物，運將的條直、硬氣及原則。第八篇〈臭頭仔廟公傳〉是咧諷刺當年政壇人物郝柏村，誠有得看。
　　即馬，咱來行入第二度思維空間，來看這本散文集的「作品」本身，道是唯文本來看語文形式及內容的社會歷史面。
　　陳金順這本散文集的篇章誠是形式優美。語句長短不一，分配適宜，段落安插誠四配，達夠視覺上清爽的美感。伊的散文語詞參日常生活語保持一款距離，創作一款差別，造成語詞新鮮醒目，互人一種繼續讀落去的吸引力，可講是語句形式優美。台灣話誠濟連音詞，親像三連音的「紅紅紅」、「深深深」、「勇勇勇」，咱日常生活語定定會三連音順口而出。文學用語當然亦可以按呢用，唔拘會互人一款「習以為常」的平淡，無特出，煞有時讀來強欲啄龜。佇〈老師妳好〉這篇，陳金順拄著「塗塗塗」三連音詞，伊是按呢寫：

黃老師真好膽，一學期內底派我參加作文佮書法比賽，
結果三字塗排作夥──塗、塗、塗，．．．

這款寫法是：先拍破日常用語的平淡，紲落三字才出現，佫加頓號隔開，產生伸長而語氣加強的功效。結果是互人讀來誠有新鮮感，有語詞的優美形式。
　　伊的篇章語句形式極美，咱可以用伊咧寫親情〈阿媽〉這篇來看。這篇散文由13個節構成，每一節篇幅長短不一，分配適當，有變化的美感，那像唯平洋夠丘陵地域連綿變遷，誠配合來寫伊對阿媽的數念之情。第一節是由「四行」組成，道是下面四行：

時間親像河，悠悠流去佗？
世間e真情，咁會綴記智e大河隨風飄流？
1966到2006跨世紀e數字加減時代e無情變遷。
伐過四十年輪e戶碇，樹尾風吹疼淡薄仔麻痺e神經。

四行攏無平長，是一行比一行佫卡長的方式伸長來，互人一款平穩變化的感觀，互人一種愈來愈長的感慨。啊！這款形式拄拄好配合數念阿媽的「四行內容」；記智隨著時間的長河，著是愈流愈長啊！有影是內容及形式的極美的結合。另外，四行形式及內容佫有一款「散文詩」美感。
　　咱頂頭有講著伊對語詞的創新，帶來形式的美。佇這段落的第四行佫出現一個例：「樹尾風吹疼淡薄仔麻痺e神經。」這句是唯諺語「父母疼囝長流水，囝孝父母樹尾風」演化創新而來的，轉化甲誠水喟：一款新罐貯舊情綿綿的美感。
　　第二節是由五個段落組成，每段攏是二行，嘛是一款特殊的形式，參第一節形成一款對比。每二行分別交待幼囝的成長裡，有阿媽的疼惜，一直夠讀國小一年仔。唯第三節夠第十一節，每節的段落的安插算是卡傳統，但是，每節及每節之間猶是有變化。親像第三節是由五個段落構成，第四節有四個段落，．．．，等等。每個段落嘛是長短不一，有所變化，視覺上有清爽變動的美感。另外，每節之間是由三粒共款的符號隔開來，唔是用數字，嘛是有美的形式感。
　　第十二節開始欲收煞，用一首歌點出一生流浪走踨。
　　第十三節是結束，有三段落，參第一節的四段落共款，攏是每段一行，所以是誠有對應。不而過，是有相反的對比美，第十三節是每行愈來愈短。請看第一節及第十三節的形式對照如下。

時間親像河，悠悠流去佗？
世間e真情，咁會綴記智e大河隨風飄流？
1966到2006跨世紀e數字加減時代e無情變遷。
伐過四十年輪e戶碇，樹尾風吹疼淡薄仔麻痺e神經。
※ ※ ※
如今，我e流浪m7-na7無結束，遂真正來到離鄉三百公里e下港。
阿媽e恩情，即世人我是無法度通報答。
伊三冬前已經去天頂做神。

第一節是唯短夠長，開展思念的長河，形式及內容誠四配。第十三節是唯長縮短，這款形式誠適當作收煞。頭尾節相反的長短編排，非常四配。這篇〈阿媽〉篇章的形式，親像咧掣讀者爬山。第一節選定入口，第二節開始爬，第三節至十一節道是佇成長山路裡，伸展小學、國中、高中、軍中、藝專等等階段，處處有阿媽關懷的點點滴滴，有阿媽參伊的生活互動。第十二節咧落山，第十三節是踏夠平地收煞。
　　篇章由十三節構成，是奇數，有無完滿的隱喻。當然世間事是無完滿，十三可講是有作者的暗示：「遺憾一生流浪，無孝養著阿媽。如今，阿媽已經去天頂做神，恩情煞無佗報答。」
　　這篇〈阿媽〉誠是一篇內容及形式足四配的奇妙散文。
　　來看〈純情年代〉這篇，伊的筆法形式足特出，篇尾才知影伊是咧寫電影〈天馬茶房〉劇情，互人一款行過磅孔，拄著桃花源的驚喜。佫親像〈彼工，風微微〉裡，嘛足濟形式四配內容的美，先摘二段如下：

上出名是四重溪e鹹鴨卵，無給你騙，免配飯礁食，絶對袂害你哽歸，茶水灌袂離；．．．．
即踏上出名是──刺歸（河豚）米粉，有影生目睭頭一擺食著，口味清爽袂油臊。

作者有影無騙你，鹹鴨卵礁食確實是「袂哽歸」。唔拘，那像咧灌肚白仔，你會茶水灌甲滿肚。用「生目睭頭一擺」的創新的形式語句，互人清爽感，拄好配合尾句的「口味清爽袂油臊」。另外，對食過日本料理珍品：河豚（ふぐ）生魚片的人，可能會產生：敢食刺歸米粉，有影是「憨膽」，唔驚死！這道產生文本再創作的藝術，嘛是陳金順語句的伸張力。
　　佫引一段有六句如下：

Na2飲茶，na2食鷄卵糕，na2鼻著愛河淡薄仔臭味，講罔講，佮永過相比併，現此時加誠體面。

語句長短分配清爽，作者點出愛河有一款淡薄仔臭味芳，暗示：猶有改善的境界。另外，茶及料理的清芳比對河水的淡薄仔臭味，這款對比寫法互人一款意外的感受，那像有食榴槤水果的氣味，抑是食臭豆腐的滋味。
　　陳金順描景手法誠是一流的。親像〈爬山練跤力〉即篇，伊約查某囡仔阿足參加登山活動，兩人攏是爬山的生手。請看：

今仔日，山頂濛濛霧霧，塗跤醬漉漉，對罕得爬山e菜鳥仔來講，路卡歹行淡薄，．．．一步踏差，阿足滑倒。
好天時仔，茲e景緻聽講真讚，即陣，霎霎仔雨，罩濛e山崙，帶有一款嬌媚e體態。
湖中鴛鴦水鴨伴相隨，毛毛小雨落綿綿，．．．阿足唱「新不了情」，我唱「愛到才知痛」，．．．伊唱我e招牌歌「秘密情人」，．．．

雨中的山景夠人滑倒掠夠足微妙，加入作者及阿足的卡拉OK情歌，描景其實是咧描心，難怪引來「嬌媚體態」的貼心圖。描景夠描心達至「天衣無縫」的地步，有影是有四配之水。
　　佇〈雨水滴落黃金城〉這篇，我舉兩段語句如下：

雨，落無停。車，一直塞。
天光早，天無光，雨猶原無時停。

第一段單單八字組成四個語句，前二句參後二句是對稱的形式。而且，一句可以短夠一字，有影是語句形式精短，卻是雨中行車的景緻寫來傳神，誠是形式優美參內容精準的絶配。第二段有影共款是神來之筆，頭兩句是「光」的活用，天光的早起，應該是有日光，煞是「天無光」，造成前後矛盾，那像無合邏輯的氣勢，答案佇第三句：雨猶咧落啦。
　　猶有足濟形式內容四配的美，事實上，篇篇攏可以揀著抾著。唔拘，留咧恁家己去抾金仔啦。
　　換一個面向，來專看內容，作一寡作品的社會歷史探訪。每篇散文攏有伊的社會歷史面，差別在濟少，抑是厚薄。這本散文集的社會歷史面的特點是：
　　１．第一輯的台灣文學紀事。
　　２．第二輯的台灣人成長史的切片。
　　３．第三輯的台灣人社會休閒生活的切片。
　　４．第四輯的台灣重大歷史事件的紀要。
陳金順筆下的文學紀事是：台語文學作家的生活點滴及運動片段，文友相扶持，寫甲足有趣味佫活跳。伊這款文學生活的散文誠少人咧寫，可以繼續進行，攏可以是將來有價值的文學史料。
　　第二輯是作者生長史的散文篇章，拄好涵蓋伊的童年、小學中學、做兵及大專生活。時間唯六十至九十年代初年。伊的成長史可看作是台灣人社會生活的切片。親像〈阿媽〉裡，道有重男輕女的婦女問題，致使阿媽互人做養女，無讀冊，一生勞苦命。有散赤人困苦，欲讀高中，阿媽操心安排學費。〈老師妳好〉傳達教師界有真善美的一面。每個學生濟少會拄著值得懷念的老師，親像作者按呢寫：

置我嘸捌世事e年紀，有一位歸年thang3天懷抱愛心e老師牽教，可比春天e花蕊，沃著溫暖e雨水．阮只有將祝福囥置心肝底，予春風吹向妳e耳孔邊，輕輕講一聲：「老師我愛妳！」

　　佇〈楊梅山頂冷風寒〉刻畫軍中文化現象。軍隊是社會的一環，所以社會有的現象嘛佇軍中出現。親像作者筆寫的：

「新婦做久嘛會變乾家」，做兵代仝款即種道理，菜鳥仔若熬到變老鳥，逐工食飽算饅頭，閒仙仙．．．拄落部隊e菜鳥仔，就假若雜差仔工， ．．．

　　第三輯是提供九十年代夠今社會休閒生活的一面向，五篇攏是遊山、耍水、行春、品食的篇章。佇六十年代進前的台灣農業社會，這款休閒生活是罕得有的。陳金順這五篇可以看是當今台灣社會休閒生活的一個切片。
　　佇第四輯裡，作者筆下的重大歷史事件是：鴨母王朱一貴革命，余清芳起義的噍吧哖事件及二二八事件。主要是針對二二八事件，八篇裡有五篇講起二二八。佇〈春天雨水滴〉裡，作者按呢收筆：

「鴨母王起義」、「噍吧哖事件」、「二二八事變」，猶閣有台灣歷史上濟濟官逼民反e故事，攏需要咱以文學e筆將怹記錄落來，這是形塑台灣人e民族記智佮集體經驗，上好e一帖藥方。

可以看出作者的歷史感足重，伊做一位作家的志氣佇佗位。咱拄好可以轉向第一度思維空間，來看陳金順這位作家。單純靠作品通常足歹掠著作家身分面向。這本散文集誠特殊，咱可以掠著誠濟陳金順的性格、身段。除去四輯的22散文篇章，佫有附錄一篇：「施俊州專訪：文學新風景、台語新世代」。若欲深入掌握陳金順的文學經歷，請看施俊州先生的專訪。

　　唯22篇散文篇章裡，我揣著的陳金順如下。
　　陳金順是桃園人，1966年出世佇桃仔園，厝裡租厝，滯過北門口及南豐街，店遐大漢讀小學及國中。1980年老父貸款買一間透天厝，全家佇伊國中二年搬去桃園龜山。學生時代拄著一位有疼心的女老師黃素敏，互伊一生懷念。厝散赤，阿媽晟伊長大成年，高中學費是靠阿媽向阿公求情，由阿公趁的錢支付。1984年高中出業，本底寄望讀軍校，會當免錢讀冊，體檢無過，無資格。做過誠濟穡頭有二、三冬。1987年初去服役做大頭兵，先佇新竹關東橋新兵訓練中心二個月，然後，分發去冷風寒的楊梅山頂的陸軍飛彈部隊。這是比較卡涼勢的單位，總是軍隊生活，當然嘛有受過苦楚。1989年2月15暗時12點，沿著陸軍飛彈部隊的「怒山大道」行出大門，永遠無回頭！
　　做兵轉來，半工半讀，佇板橋藝專專攻廣播電視科，期間做過臨時演員，彼時是有數想做導演。佇〈臨時俳優導演夢〉裡，伊透漏心聲如下：

因為個人對電視界大環境e失望，無話無句恬恬來離開。即幾冬來，我給過去彼個導演夢囥置心肝底，真少閣想起，給喟力用置創作、推廣台語文學頂懸。

　　斷念電視界，1995年正式踏入台語文學創作這條路。十年之間出兩本台語詩集：《島鄉詩情》及《思念飛過嘉南平原》。或參與、或催生文學團體，包括「台語文推展協會」、「台灣新本土社」、「台文戰線文學社」。編輯「茄苳」文學雜誌，主編「島鄉」台語文學雜誌，主編《台語詩新人選》，編輯「台文戰線」季刊創刊號及第二號。以「台譯賴和小說系列」得過「1997台語文創作獎」（台語世界雜誌社）、「南瀛文學創作奬」等。
　　伊自述人生成瘦佫薄板，佫自稱個性閉思，常在揣無人相借問。伊是外表恬靜；事實上，內心誠是火熱。伊是彼款：「拄著知己，千杯酒無夠飲；若不投機，三句話嘛嫌濟。」讀伊這本散文集道知影：伊是真情咧出心泉，咧醞釀文學醇酒；看讀者那知己，欲參怹分享，將家己寫甲成一個文學的透明人。夠今，四十歲，自稱一生流浪，趁唔成錢。伊佇〈阿媽〉裡寫著：

退伍了後，頭路一個換過一個，無論是去板橋讀藝專e前後攏相像。到旦四十歲猶一箍人liu3-liu3，一月日趁兩萬統箍，餓袂死脹袂肥。干單一件代誌拍死無退上堅持，就是對台語文學即項一般人認為擔砂填海了憨工e代誌，深深迷戀。

　　有影，人是家財上億，伊是無錢。伊憨人獨資主編「島鄉」台語文學雜誌有31期，台語文學刊物無人發稿費；伊疼痛尊重作家，雖然伊無半銑閒錢，嘴齒根咬咧發稿費。台語文學是伊的生命，誠實是按呢；伊人窮而文學窮以致之，這本散文集是見證。
　　除去頂頭伊即款清楚的陳述，其實唯這本散文集的書名《賴和價值一千箍》，咱嘛可以感受著伊的決心：做一位台灣文學人。賴和是台灣新文學之父，陳金順是有以賴和為師的志氣。佇〈賴和價值一千箍〉這篇裡，提起伊台譯過賴和的多篇小說。伊選〈淡薄仔春光〉等五篇台語文學紀事作第一輯，唔是選其他的散文篇章作第一輯，唯遮，共款可以感受著伊為文學拍拼的意志。
　　若講台語文學創作，抑是編輯文學雜誌，伊是一位傑出的、新世代的台語文學人。自稱前世人是南瀛人，難怪文友志友攏是徛南瀛，不時往南瀛行踏。咱看伊佇〈焚茶煮詩配月光〉篇章裡，書寫伊的心境如下：

即跤兜，南瀛、府城e仝沿文友耀乾兄、定邦兄、正雄兄、華斌、俊州，漸漸箍偎一個圓，日日呼喚我即隻漂流北地e白鴒鷥，趕緊飛山過河潦溪轉來嘉南平原，作陣焚茶煮詩配月光。
　　
　　即篇寫了無偌久，真情滿滿的陳金順真正佇2006年初搬落南瀛定居，滯佇永康的埔姜頭。可見文學對伊的重要，伊是為著文學咧活。這搬徙，互台語文學佇南瀛的陣營達夠一款「臨界量」的地步。人講的「量變夠質變」，親像鈾元素的「核子反應」，道是鈾的斤兩數量達夠「臨界量」的必然現象，釋放出無限的能源。台語文學咧捒向一個新的境界，陳金順是「臨界量」的其中一位。伊這本散文集《賴和價值一千箍》道是一個見證。我以「三度思維空間」的觀點來寫這篇序，其中一個原因，道是早就觀察著這個「臨界量」事實，手足癢，無按呢寫，未使得啦！
　　夠今，台語散文猶是那像早起天欲光進前的天星：零零星星，台語詩量濟甲是滿天美麗星斗，攏是星光無天光。恁若是台語文學的作家，我招恁來寫散文，因為，散文是接引台語文學行夠「天光」的必要道路、是一個新興的台灣民族文學的基礎。台語文學地基若欲栽欲勇，絶對需要數量龐大的散文。啊，陳金順這本散文集是有誠濟互咱學習的所在。
　　佇車禍復原的期間，有幸讀著陳金順的散文集，互我心情開朗，療我的傷，助我行過一段日子。
　　捧一杯茶，坐落來寬寬鼻，保領恁會鼻著陳金順散文之美，互恁耳目清新。

－－胡民祥寫佇茉里鄉
　　二千空七年，七月十五