刊於「海翁台語文學」2015.11月 第167期 p.80

人講：「六月火燒埔，七月無焦塗。」

這陣雨相連紲已經超過二禮拜，目前嘛過了七月半，古早人的智慧果然不同凡響！不過，這只是經驗的累積。

也就是講，毋管是智慧抑是智識，總是唯錯誤當中整理出來的正確的經驗，經過有系統的整理，就是一般所講的科學。

讀冊彼陣有修過「氣象學」。當時，教授講氣象預報，有相當的成分嘛是依賴著民間俗諺。

這句：「六月火燒埔，七月無焦塗。」著是一句重要的俗諺。

七月半過了後，時序已經進入秋天，雖然已經有淡薄仔涼冷，不過這只是雨落久所造成的氣溫降低，相信當雨停的時陣，猶原會回復火燒埔的天氣。

這閣有一句氣像名詞，叫作「秋老虎」。彼種天氣，透早加穿一領，到中晝幻勢愛加褪一領，到尾晚秋風涼冷嘛閣會流汗，是一个壞穿衫的天氣，甚至閣會起風颱。

中秋風颱暝相信蓋濟人有經驗，嫦娥維月宮看人間做風颱，彼是啥情景啊？現代科技的「追風計畫」應該會當了解才著！

今仔日透早出炎日，滿天無雲清朗朗，啥知八點外，雷電閃爍，雷聲乒乓吼，大雨若倒水，不只無焦塗，閣強欲做水災。

在庄跤有時雷聲閃電過落大雨，老大人攏會講：「西北雨落袂過田岸路！」果然無錯，庄頭雨水淋灕大細漢粟仔扒袂離，庄尾稻埕卻是焦離離。

現在科技進步，飛機會當飛入風颱中心去觀察，人造衛星會當佇太空翕相，加上氣象嚴重變遷，氣象俗諺愈來愈失去參考的價值。

將來幻勢變成是神話傳說而已，時代咧變，人心咧變，人講人無天理，天就無照甲子，真正是安尼嘛？這已經是超越科學，但是猶閣使人煩惱的代誌啦。