〈散步〉2019-03

打狗的春風誠愛揣阮覕相揣

四界攏揣無伊的形影

敢是覕佇愛河邊

抑是藏佇柴山頂

原來伊覕佇美術館附近

一欉一欉親像青色雨傘的樹尾

有伊一葉一葉的笑容

歇熱的時陣

阮穿一雙淺拖仔

慢慢仔行到哈瑪星

食一碗透心涼的礤冰

坐船來去旗津的海邊

呷小管仔看海湧

毋管生活酸甘甜

大聲共海講出心內話

等到日時愈來愈短

月娘愈來愈圓的中秋

加穿一軀衫

騎車去踅夜市

豬血粿抑是鹹酥雞

毋知打狗的秋天是啥物滋味

靠海的港都

日頭規年迵天赤炎炎

透早去魚仔市

上鮮的現流仔攏佇遮

暗時做伙去廟口看電影

坐佇路邊呷火鍋

答喙鼓拍抐涼，笑問

冬天當時才有閒來阮遮

阮自一心行到十全路

牽著青春的美夢做伙向前行

阮用偌濟時間來交換

西子灣金爍爍的海湧

柴山頂光炎炎的日出

無人的海邊鬧熱的夜市

無論阮分開有偌遠有偌久

心內攏有一咧所在

定定有海風一陣一陣吹過來

遐有阮的青春阮的美夢

阮做伙行過的人生路