行過銀行大樓邊的時，遠遠就看著一个麥仔色頭毛的查某囡仔坐佇塗跤咧看冊，毋知是咧等人抑是跤痠小歇喘一下。西洋人旅行的時真慣勢「隨遇而安」，這款行為無啥奇怪。

這个亭仔跤開闊，銀行大理石的壁清氣閣涼，靠咧坐也袂bái（差）。毋過，我行倚（uá，靠近）的時，看著彼个查某囡仔身軀邊囥（khǹg，放）一塊紙枋，面頂用華文寫：旅行中，需要食物。

喔，是這世代的少年人流行的自助旅行方式。毋過，一般敢若是一路旅行一路做散工，抑是佇街頭表演趁（賺）旅費；像按呢坐佇路邊恬恬等人予伊食的，較罕得。

我那行那想，是毋是伊無啥特別的才藝會當表演，短工嘛毋是凊彩揣（tshuē，找）會著，不得已才用這个方式要求幫助？二十外歲，閣生做媠媠仔，著毋通予歹人拐去。

隨想著幾日前一个新聞：一个查某囡仔轉來台灣，講伊去幾若个國家旅行，食、蹛（tuà，住）主要是靠在地人的幫助；「用上少的所費行遠路」的目標才有法度完成。外國人按呢對待咱的囡仔，咱敢毋是愛按呢對待別人的囡仔？

這時陣，我已經行離開伊二、三十公尺，越頭行轉去提錢予伊上簡單；但是，按呢做感覺怪怪，可能伊也無歡迎。好咧頭前無偌遠有賣饅頭、大餅的；這个攤仔我交關過，好食。而且，這款物件兩三日食無完也袂歹去。我就按呢買三種，有鹹的有甜的，提去予伊，講，「一點仔食的，希望你會佮意。」伊歡頭喜面，共我說多謝。

希望一點仔誠意對伊有一點仔幫助。

2019.1.25《聯副》