人和人之間通訊方式的變化有夠大。連我這種無愛逐電子產品的老派人除了電子批和面冊以外，這兩三年嘛漸漸需要用 Line來和人講話矣。

我算是真有撙節，加入的Line群組無超過十个。我看有的人手機仔拍開，名單躼躼長，敢若生理（意）做真大。

家己人（家人）、好朋友的群組上有路用，有代誌欲吩咐、參詳抑是通知，毋免一个一个連絡，佇手機仔面頂寫幾字，逐家攏看會著，早慢會答覆（至少會回你一个圖）；有意見，也會當共同討論。

初初加入中學同窗群組的時，我才知影啥物叫做「長輩圖」。有的同學真好禮，「早安」「晚安」，照三頓請安，三不五時插一寡「知足」「惜福」。後來逐家有進步，用家己翕（hip，照）的相片來編輯。有的人分享家己旅行的風景，抑是家己種的花來予逐家知影伊的生活動態。有人興分享各種短片，逐日傳物件，甚至一日傳不止一篇，煞（suah，竟然）變做「洗版」。像烏心食品製造的實況，新的詐騙步數這款文章，看甲予人感覺世界誠烏暗。

其中也有人信教真虔誠，不時傳道理，講神跡共逐家洗腦。有的人傳的是政治議題，予無仝立場的人看著鑿目；有同學氣怫怫，講透早讀著彼款糞埽（垃圾），規工的心情都予伊拍歹去。我講，幾十年的交情，講重話傷感情；當做伊真閒，真寂寞，無代誌做，才拍拚分享遮的有的無的，莫讀就好。

講是按呢講，我猶是感覺既然使用Line，總是愛有基本的原則。

有特別功能性的是上課的群組，可比畫圖課、書法課。這款群組，主要的是傳老師示範的作品。以前，每節下課，逐家就排一列長長，提相機輪流翕。這陣，人人有智慧型手機，班長抑是熱心的人會翕來傳予逐家。甚至，老師示範的時，有人綴（tuè，跟）咧錄影，然後貼佇群組的記事簿仔頂頭，予認真的人一筆一筆閣再複習老師的手路。手機仔小小仔，會當提來提去，看伊來畫圖比看電腦畫較好勢。

毋過，來學畫圖、寫字的同學大部份是退休的老人，時間冗剩（寬裕），總是有人愛分享和功課完全無關係的文章。無去旅行會後悔一生的世界級風景；這條歌無聽著，這世人就白過；你想袂到的部落風俗；世事無常，拄（tú，遇見）著緊急狀況按怎急救？做啥款運動來保養你的跤頭趺（kha-thâu-u，膝蓋）；人生有限，愛會曉「放手」，做開明的爸母；閣有做人的金句良言等等。

有的文章/短片確實有意義，有閒罔看，會當增加你的智識、拍開你的眼界。毋過，有的人敢若共Line當做伊個人的舞台，寄一篇閣一篇，我都懷疑伊家己有讀過無。予人上反感的是，有的人足愛談論政治和社會議題，閣有教育別人的使命感，不時分享這方面的文章。伊選的當然是佮伊的意識型態仝路線的，所以，攏是單一的、極端的觀點；也可能只是一寡假新聞。有一陣，畫圖班內底就不時出現關於年金改革、同婚的文章，內容誠譀古（荒誕），誠激烈，竟然閣叫人鬥陣轉寄。彼位拍拚貼文的，聽講是教授退休的。

好佳哉，後來老師也看袂落去，有一工，伊佇白板頂頭寫：宗教、政治四字，然後講初初來遮教畫圖的時，辦公室主任就提醒伊，上課莫講宗教和政治；彼是個人的選擇，無適合佇遮討論。老師希望逐家佇群組頂頭，也莫談。

「也莫講直銷。」伊加一句，按呢較袂遐爾（hiah-nī，那麼）嚴肅。逐家心內有數，以後就無閣再出現遐的有的無的文章矣。

2018.10月號《文訊》雜誌