一段時間無寫台語文，竟然就生疏起來；有的字明明寫過足濟遍，也需要去查教育部的辭典。莫怪做囡仔的時，不時聽著大人講：三日無餾（liū），就peh（爬）上樹。

意思是，讀過的冊，無一遍一遍複習，就真緊袂記得。毋過，哪會peh上樹？囡仔退化變做猴山仔？

去網路查，面頂講這是比論你學過的物件若無練，會像膨鼠、猴山按呢咻一下走去樹仔頂，無看見矣。

學過的智識會走去樹仔頂？這个講法，怪怪。毋過，餾、樹兩字鬥句，念起來真紲拍（suà-phah，流利）。

後來，和朋友講起，有人講這句俗語另外一種意思是：

三日無共你練（教訓），你就變做猴齊天，亂亂來矣。

餾，較tsia̍p（常）用的是餾粿。以前無冰箱，年仔節的粿，隔一兩工就愛炊一遍，才袂生菇；食過頓的菜，驚臭酸去，閣炊一遍也會使講餾，不過，阮較慣勢講的是熥（thn̄g），熥菜。

趣味的故事，提出來餾，逐家閣再笑一遍；人無佮意（kah-ì，中意）聽的話，提出來餾，就會予人變面，「幾百年前的代誌，你閣揀起來餾！」

2017.12.27《聯副》