十月一日國慶日，好多人都會選擇利用呢個假期外遊，而我亦唔例外。
至於今次嘅目的地係日本嘅首都：東京
雖然呢次行程比較匆忙，兼且天氣欠佳，
但係呢一次旅程實在令我有頗大嘅成功感，
有咩成功感? 容後再述啦!!

十月一日 (星期五) 晴

4:00 AM
由於當日集合時間係 7:10AM, 所以要比平日早少少起身。

5:50 AM
喺屋企樓下搭頭班巴士去機場。

7:15 AM
喺機場指定位置集合辦出境手續，
至於航機就喺 9:50 AM 起飛。

3:00 PM (日本時間)
航機抵達東京成田機場。

3:50 PM
好鬼死憎個爛鬼成田機場，又殘又舊，過關又嘥時間，
我哋要等成半粒鐘，先至可以辦到入境手續。
再加埋攞行李，足足玩咗我哋 45 分鐘。

4:00 PM
正式開始行程，不過第一站係返酒店抖下先。
(真係太好啦~~因為我實在攰到唔想郁。)
由於成田機場距離東京都幾遠，所以嗰晚喺成田市過夜。

6:00 PM
跟導遊去咗附近嘅 Aeon Plaza 食晚飯。
我嗰晚足足食咗兩餐。
第一餐食咗個鐵板牛扒套餐 (請看上圖)
價錢唔算太貴 (￥980, 大約 $70 左右)
不過當一食咗舊牛扒落肚之後，就覺得呢一餐物有所值，
因為塊牛扒入口即溶，嗰種滋味實在難以形容啊~~

9:00 PM
我哋飲飽食醉之後，卒之捨得返酒店。
我一沖完涼就撻咗落床，一分鐘唔夠就瞓著咗喇。
(真係好耐未試過咁好瞓啦!!)