右圖：芝山滑雪場

冬天去韓國玩，可以比平時玩多一樣嘢，就係滑雪啦!!
而我呢一次去韓國，我最期待嘅節目，亦肯定非滑雪莫屬，(須然我未試過)
所以到咗第二日，一聽到去滑雪就開心到彈起。

由仁川去滑雪場嘅路程頗遠，大約需時個半鐘，
但係由於仲要去滑雪場附近嘅舖頭租滑雪褲，買手套等等，
所以最後搞成兩粒幾鐘至去到我哋嘅目的地：芝山滑雪場。

假若冇任何個人滑雪裝備嘅話，去滑雪其實一啲都唔平，
以下就係當日嘅洗費，以供參考。

租滑雪褲 ： W 15,000
買滑雪手套 ： W 10,000
滑雪用品及纜車徑套票 ： W 48,000
儲物櫃 ： W 1,000

埋單計數，總共駛左 W 74,000，
除番港幣大約五百幾蚊左右。(仲未計其他飲飲食食嘅開支)
雖然係咁，呢一次難忘嘅經驗，都算值得呢!!

嗰個芝山滑雪場分咗低、中、高三級賽道，(高級嘅賽道真係又高又斜)
當然好似我哋呢啲初學者，梗係玩初級賽道啦!!
我哋個導遊本身都有教練牌，所以就好順理成章咁由佢教，
佢教咗啲基本嘢之後，就各自去滑雪。

滑雪某程度上，同溜冰嘅玩法好相似，
所以對我嚟講，我唔需要好耐，就可以掌握到箇中竅門。(真係好易架)
到咗最後，真係玩得開心到唔願走。

經過呢一次之後，我巳經開始愛上咗滑雪，
所以我決定今年冬天再去玩過。(如果到時夠錢去旅行嘅話)
( 按：原來佢哋有網頁架，網址係 http://www.jisanresort.co.kr )