近排同彌敦道好有緣，兩個星期遊咗四次，仲要每次都撞正烈日當空，暖風吹送，由尖咀行到旺角，幾乎行晒全程（雖然用既時間都唔過九個字），熱已經唔係問題，最死既係Ｄ汗，濕完之後吹返乾，乾完之後又出晒汗，有種難以形容的不爽，但有時諗諗下可能係報應唻，因為頭個次行係我整蠱亞媽，基本上我冇惡意，冇既，佢話行街丫嘛，咪搵條最長既街同佢行law~~早知就咪玩咁多野！

可能係之前過左排養尊處優既日子，郁動得少，突然間咁大運動量，一時負荷唔到，返到屋企唔坐低由自可，一坐低Ｄ肌肉就痛到起入心，可能係連行咗兩日既關係…總之就一個痛字…初時為左無咁痛係大字型咁灘係張沙發到，但鬼死咁熱，所以就灘左係地，話時話，地下冰冰涼涼，真係舒服好多，唯一問題係亞媽細妹行唻行去好易踩到我…或者話有心唻踩我…

尋日出街仲有小插曲，係我見工時（呀係，我尋日出街係為咗見工！），我見工通常都會帶本書係身，因為通常見工都係等既時間多，冇事做都幾難捱，而尋日我就帶咗本叫刑罰的歷史，當我等咗個幾鐘，睇得津津有味既時候，俾人叫咗入房，本書收唔切俾個經理見到，um…佢冇睇到內容，只係望個封面問咗句：「呢Ｄ你有興趣ga！？」我衝口而出：「參考下啫…」唔知點解佢掃咗我一眼應話：「哦~參考呀…」好彩我冇用研究呢兩個字，唔係就真係…用字不當既後果…原本唔只會俾人笑…