（台語散文）

掌聲稀微的舞台－－台文創作一路行來／陳潔民 2001.12.2

　　下暗，我佮朋友針對台語創作的觀點進行真濟的交流，講到路尾，伊講伊真佩服我對台語文學創作的理想佮熱情，毋閣，伊試過了後，決定放棄矣。
　　我問伊，汝講汝試過？安怎才號作試過？汝攏總咁寫有十首台語詩？
　　伊笑笑，當然嘛無。
　　我講，汝當初開始寫新詩的時陣，咁就真賢寫？抑毋是有真濟詞彙毋捌？所以講，汝是因為對新詩有真大的熱情才會繼續寫新詩，所以毋免講，汝自然會搰力去充實即方面的知識，嘛會去揣真濟詩人的作品來讀，無進步才有奇怪咧。咁講，汝認為寫十首詩就會當出師？寫無到十首台語詩，汝哪會茲呢緊就認為汝佇台語詩的試驗失敗？
　　為啥物真濟寫新詩的「台語人」（佇即個所在，我所講的「台語人」的定義，是母語講台語的人），無想欲來寫台語詩咧？
　　我想，除了對母語創作無認同的人以外，有的人可能是因為毋咁放棄現此時佇新詩創作界真無容易才建立的地位；也因為伊對新詩創作非常執著，而且對新詩的創作方式佮語言比較熟識；嘛有可能是因為對台語文的無了解、或者是無因緣佮機會通了解；嘛有人是因為伊使用台灣話文的語言書寫工具無夠利；所以毋肯轉換跑道。
　　是講，我一直安呢認為：除去少少有創作天分的人，抑若無，一個創作者，伊對文學創作付出的熱情若是有限，就無可能寫出偌呢偉大的作品來；換一句話來講，對台語文學創作的付出茲呢有限，欲哪有可能佇台語文學界寫出啥物成熟的作品來？當然會有嚥氣、失望佮放棄的情形來發生。
　　有付出，才有可能收成。無付出，想欲收成任何物件，絕對無可能。茲咁毋是千古不變的道理？為啥物一般人抑是茲呢現實功利主義咧？眼光為啥物無愛囥卡遠的咧？即個時代，咁講，連古早以來上蓋強調「任真率性」的詩人，攏無法度堅持應該有的理想，都落入即個陷阱啊囉？無的確我甚過感傷，但是，看到即種情形，實在使人不得不吐出一口長喟，感覺稀微。
　　無毋對，每一個人攏有家己創作方式的選擇。
　　回想我第一擺寫台語詩，是讀大學三年的時陣。彼當時因為修了一門台灣童謠的課，教課的簡上仁老師，要求逐家愛創作台語囝仔詩來做作業，互我開始注意台語詩，而且閣一時真有興趣，一擺寫幾落首，閣自認為寫得亦可以。投稿報章雜誌了後，干單臺灣時報捌刊出一首，其他的袂輸若親像石頭沉落大海，連一絲仔回音都無。
　　彼當陣，實在毋捌蓋濟台語字的寫法，更加免講啥物白話字抑是羅馬拼音。烏白寫的彼幾首台語詩，實在揣無發表的所在，嘛逗逗仔磨去了我創作的熱情。一方面，當初嘛毋捌半個台文創作者，無人鼓勵，嘛無人通作伙討論、交換創作的心得，閣卡嘜講有啥物人會互汝掌聲。所以，我捌停睏台文創作兩冬外。
　　了後，一直到讀研究所二年仔升三年仔的歇熱期間，佇台南南鯤鯓鹽份地帶文藝營熟識一寡仔台文創作者，彼當陣我佇參加文藝營的過程，激發我的靈感，遂寫出一首台語詩「目屎的屈勢」，坐佇邊仔的朋友葉益榮就介紹我熟識「島鄉台語文學」主編陳金順，怹兩人攏互我真濟鼓勵。「島鄉」提供我發表台文作品的天地，陳金順嘛鼓勵我提出勇氣向別的台語文雜誌投稿，親像「掖種」、「蓮蕉花」、「菅芒花」、「時行」等等，我攏捌投過詩稿。雖然我無寫出偌濟卡好的作品通投，毋閣茲的台語文學雜誌，佇我從事台文創作的過程中，攏互我真濟創作上的精神鼓勵，尤其是鼓勵新人方面，我相信「島鄉台語文學」將來佇台語文學史上，必定有相當重要的意義，因為有「島鄉」即個提供創作者發表作品的所在，我才會開始認真寫台語詩。
　　上重要的是，我佇茲的台語文學雜誌，看到濟濟前輩的台文作品，佮真濟和我共款初初寫台語詩、從來毋捌見過面的詩友的作品，總算袂感覺寂寞矣，有一種揣到知音的歡喜充滿在心，所以開始重新投入。到旦，說長實在無長，干單三年外，所發表的台語詩我家己雖然無統計，我想小可仔會當看的作品可能只有幾十首爾爾，散文無到五篇，小說至今抑無勇氣佮時間來試。講起來有影見笑，作品的數量實在真有限。若是欲講家己台文創作一路行來的心聲，可能嫌甚早。
　　毋閣，我有滿腹的話，想欲甲我的朋友講，就無去考慮安呢是毋是會互人笑矣。
　　其中一層代誌，就是我對台文的熱情的問題。雖然伊講伊佩服我對台文的前途茲呢樂觀，抑閣充滿著理想，毋閣，我聽著實在真心虛，嘛真歹勢！我自早就認為家己毋是一個真熱情的人，嘛毋是一個行動派的人，無偌興趣投入台語文學的運動。所以，我可能袂去推廣逐家愛來講台語，寫台灣字、教羅馬拼音，我有的只是一腹創作的熱誠爾爾。而且，我大概是天分有限，無法度喝欲寫，就隨會當寫台語詩抑是台文作品，一定愛有靈感，有創作的衝動，才寫會出來，所以創作量就卡有限。若無靈感，我甘願幾個月無寫嘛無要緊。
　　我承認我對台語文學的教育真重視，可能是因為職業是教師的關係。我會主動揣機會去教我的學生囝仔寫台語詩、紹介台語文學互怹欣賞，甚至設台語文學的網站，互怹有空間通好發表台語詩。我一直感覺，一定愛互台文繼續佇咱下一代發展落去。嘛因為我對台語詩的熱愛，所以真希望怹佮我共款，有接觸台語文學的機會，映望怹會當來了解台語詩伊嫷的所在。
　　走筆到茲，心內的感慨深甲若海。我的朋友無從事台文創作實在真可惜，因為佇我大學三年仔彼個時陣，我的台語比伊加真破，伊的台語是我學習的對象之一，而且彼當時伊就已經有寫過台語詩啊！我想，伊對台語文學的創作若是彼當時就繼續拍拼，今仔日一定有相當的成就。想袂到我開始大量用台文創作了後，伊遂來停筆，閣甲我講伊感覺伊的台文退步真濟，程度已經拼袂過我矣。我聽了後，一點都無歡喜，因為投入台文創作並毋是為著欲佮伊車拼，只是因為對台灣話的熱愛，我真希望伊會當重新行入來台文創作的行列，體會著我的心聲。
　　雖然台文創作是一個掌聲稀微的舞台，亦毋閣，有真濟人攏佇即條路無計代價、無惜氣力佇咧走闖、拍拼。人生短短，早慢每一個人攏會行上生命結束的彼一日。來即個世間行踏，到底是為著啥？咱為一層有意義的代誌拍拼，咁會有啥物損失？應該啥物時陣死，就會啥物時陣死，嘛袂卡短歲壽，實在無應該因為台文創作的未來茲呢坎坷多憂就來放棄。我真想欲安呢講：

　　朋友！我鼓勵汝！
　　請汝互台語文學一個機會
　　去接近汝的生活，
　　請汝互台語文學
　　來充實汝創作的生命，
　　嘛請汝互家己一個機會
　　去為台語文學拍拼！
　　我正港的，深深期待
　　汝惟台語文學的路頂行！