童話台語詩系列１：

賣番仔火的查囝仔／陳潔民2001.10.23

「有人卜買番仔火無？」
無人將跤步停落來
無人對伊溫柔相借問
童話中的查囡仔嬰
輕聲仔細細
驚惶仔驚惶
問著生份的過路人客

一個一個
無法度引人注意的盒仔底
貯著一支支的番仔火
茲的小小的番仔火
戴著紅色的帽仔
怹是查囡仔心肝內
所有的希望
賣袂去
就袂當返去

番仔火，一支一支點
夢，一個一個空

天色愈來愈暗
風，咻咻叫
雪，直直落
卜安怎？番仔火
無人來交關
天氣茲爾寒

點起第一支番仔火
伊看著別人歸家伙
圍置火爐邊團圓
點起第二支番仔火
伊看著桌頂好吃的物
有雞蛋糕、火雞、聖誕樹
點起第三支番仔火
伊想著啥物咧？

番仔火，一支一支點
夢，一個一個空

第三個願望
就佇伊逗逗仔失去溫度的身體的
空思夢想中成真矣
伊見著蹛佇天頂的阿娘
將伊輕輕攬偎
伊一雙目睭微微閤起
永遠袂閣精神

細漢時看到茲
目屎就一粒一粒輪落
阮總是會記得
寒天的暗暝
有一個可憐的細漢囝仔
佇故冊內底
細聲細聲
置賣番仔火

番仔火，一支一支點
夢，嘛一個一個空


註：
番仔火：火柴
卜：要
跤步：腳步
查仔囡仔嬰：小女孩
貯：裝著
茲的：這些
交關：購買
茲爾寒：這麼冷
攬偎：攬近
精神：醒來
故冊：故事書