因為知影／陳潔民2003.10.2

因為知影人生的苦情，真濟年來，我佇人海當中，苦苦走揣自在。

有人講，解脫的人生，就是佇痛苦當中超越家己。

成作一個人，就是要體會人生的鹹酸苦澀，嘛接受人生一切的過程，攏是家己應該經歷的風景；鍛練出親像大海彼一般的意志，培養出堅強的定力，提煉出曠闊的智慧。

到彼時，所有人生內底的痛苦佮快樂、悲傷佮歡喜，就變成足自然的代誌，每工，就會佇平凡佮知足之中，清靜自在過日子。

因為知影人生無永遠這件代誌，我希望家己早一日體會到無常的真義，了解安怎事事項項佇「當下」的道理。

看過金剛經，內面有一段經文互我印象真深：「過去心不可得，現在心不可得，未來心不可得。」免講啥物外在的物質，連咱家己的心念，就無法度抓著，有啥物物件會凍永遠無變？

為啥物咱逐日攏khooh-khooh追一個又閣一個的念頭？彼是真忝的代誌，嘛是虐待家己。

因為知影，所以。