汝講人生袂當傷認真
嘛袂當無認真
若是安呢
到底是欲認真？
抑是嘜認真？

給人逗衫工
應該是一盞好代
受人拜託
做淡薄仔物件
遂有人眼孔赤
直直講咱傷拍拼
互人的壓力傷過大

反省家己
做代誌的時陣
咁有像怹講的赫呢認真？
只不過是有做而已
對得起家己的良心
遂來礙著人的目睭，礙著人的鼻

想攏未曉－－
做得到的，為啥物
著愛刁工做乎爛？
做有八十分的，為啥物
干單做到及格爾爾？
咁是驚人講閒話
講咱傷拍拼？

原來，做人的態度
真正無應該認真
若是安呢，欲安怎度日？
我橫的想，直的嘛想
圓的想，扁的嘛想
想到天色惟白變烏
早起變作暗頓
日頭換成月娘

為啥物給人逗做食
會去給人得失？
有矣，我想通矣！
愛認「斟」－－
親像古早的婦仁人
量米煮飯的時陣
愛認「斟」－－
佇認真的時陣
著愛時時斟酌
安怎才有夠，安怎才袂過頭
煮傷少是無夠，煮傷濟是食袂了

人情世事
抵著不如意
抑是好代誌
攏毋通給伊認「真」
因為赫仔代誌全全變化了了
啥物是假？啥物是真？
真真，假假真真
認斟著好，毋通認真

註：斟，是昔日臺灣婦女用來量米的量米器。