【台語散文詩】
 
石英磚的獨白／ 陳潔民  

     
你踏到我的心矣。
 
光映映的土跤，大面石英磚頂懸，映照我明月彼一般的心。毋過，你彼雙獵鷂共款的目睭，若像看未出來。
 
無淡薄仔躊躇。你，踏佇彼頂面，大步大步，向前行去。留一個一個無感情的跤印，印佇我的心肝頭。
 
你並無越頭。當然，世界一向是恬靜的，佇你離開我的時陣。
 
你並無越頭。當然，你會揣到真濟藉口，佇你未記得我的時陣。
 
親像是，你並毋知影你一直踏到我的心；親像是，你一向目頭懸懸，毋捌看向土跤，哪會知影我的心肝佇叨？
 
輕音樂的聲音閣傳過來矣，有曼歐鈴的弦仔聲，真滑溜咧演奏《流浪之歌》。你的跤步快緊，繼續對音樂出現的所在向前行，並無越頭。
 
我的心，你永遠看未到。你可憐甲赫呢稀微的記持，恐驚仔嘛無可能會記得我的存在。何況是──我心的所在。

 　　　　　　－－寫佇半線2011.09.23初稿2012.01.06定稿

                             刊佇《台文戰線》26期2012.04