【詩】毋甘－－送互我的阿母（之二）／陳潔民2009.1.12

汝十二月二十七

透早佇佛堂跋倒

為著卜拜拜敬茶

汝真敬心

相信佛祖神明會保庇



看到汝無助的模樣

一定真疼哄？

送汝去竹山看老先

伊講要開刀

先去竹山秀傳照x光片

果然像伊講的

股骨頸骨折

一定要開刀

只好用救護車

送汝返來彰化秀傳

準備開刀

結果汝講

司機的技術真無好

路無平亦無閃避

害汝疼甲卜死

歸路喔吚喔吚叫

害汝真緊張

抑是坐我駛的車卡舒適



自汝跋倒了後

住秀傳病院七日

第一工暗時十一點

開始開刀

我和二姐、二姐夫

佇開刀房外口

為汝唸咒

希望幫助汝渡過難關



手術進行一點偌鐘

汝閣佇恢復室一點偌鐘

出來的時陣，已經是一點卜半

看到汝的面容

嚇呢仔白

汝講：真寒



汝又閣講手術的時

汝攏未驚

感覺真舒適

毋閣一人佇恢復室

煞感覺愈來愈寒

甲護士討棉被蓋



送汝返去病房

為汝安搭好所有一切

嘛毋知時間幾點矣

歸工的走蹤

我沉沉睏去

不安的睏眠中間

干單知影二姐攏無睏

一直照顧汝



身苦病痛

是做人一定會拄到的

代誌

自汝少年

就拍拼做工課

給阮養飼

如今，會當報答汝

阮是真歡喜

只是毋甘

汝受苦的時陣

目屎流、目屎滴