102年屏東縣長治鄉客家青年菁英返鄉論壇活動8月12號（拜一）朝晨9點到下晝4點半在長興國小二樓視聽室舉辦，主持人校長也係客委會委員介邱坤玉首先紹介屏縣府客務處長曾美玲、長治鄉長許玉秀、屏教大文創系主任易毅成、大仁科大教授黃鼎倫、客研中心主任張重金、包裝設計理事長陳啟章、潭頭村長邱清春及長興村長邱武康等等與會貴賓，邱校長表示：佢自家係美濃人、在故鄉有兩介概有名介協會，一個係美濃愛鄉促進協會，這介協會係年輕一輩介子弟為著家鄉介發展特別歸來組成。佢兜用心來研究將稻米來改良成有機米（毋賁農藥），這下做得同台東介池上米以及花蓮介富里米來比較，今介銷售量盡好，每擺田坵肚開始楒禾介時節米就已經賣淨了，故所在這鼓勵長治介學子將來事業有成愛歸到故鄉來發展分上一代介老人家有慨好介傳承。

　曾處長致詞時問到：會講同會聽客話介請舉手，結果毋幾多學生仔舉手，可見到客語流失介嚴重性，故所愛對社區來推廣客家人愛講客家話介運動，同時自家愛以身為客家人為光榮，搭愛認同係六堆前堆介長治人，像葛瑪蘭族介人不管那個時節就講佢等係宜蘭人，這就係講時常愛認同自家族群介精神。

　許鄉長指出：對上任以來就開始想將長治鄉介特色彰顯出來，像看到里港就想到餛飩、看到萬巒就想到豬腳、看到萬丹就想到紅豆、故所最近已請到大仁科大介文創教授來騰手構想規劃長治鄉介特色景點結合農特產品，另外推動客家事務方面這幾年來持續辦理客語研習班（基礎同進階班）通過中高級認證考試介也毋會少人、明年時節公所會配合長興國小來同客家委員會提出客家文化生活營造計畫來申請經費對長治圓環開始來結合各政府機關延伸到長興國小彩虹館來完成一個文化廊道，到時來分鄉民一個盡好介休閒空間。

　朝晨介過程係專題演講，由客務處曾處長來對客家文創主題來論述，下晝進行與會貴賓做引言人同學子來做雙方面介討論，在座談會介當中有分幾界學生仔來發表心得同想法，這兜後生人也講出自家對客家文創介期望，臨尾時節也有客家子弟來建議，希望不久介將來長治鄉嗎做得像美濃共樣來成立由年輕人所組成介長治愛鄉協會，也期望大家得共下對故鄉客家文創產業來盡一份心力，因而打響長治介知名度。