好辛苦呀~~~~~~~~~~~~~~~~~~~~~~~~~~~

由於各位同事出盡力跑既關係,好明顯星期二一開工個個都要用手抬起自己隻腳行路咁滯,而最搞笑同家長一見面唔係講早晨,而係問"點呀~痛唔痛呀?""隻腳有無抽筋呀?"等等問題,所以我都覺得陸運會之後同家長既關係好好,不過下年唔好再搞呢個比賽,真係會死人o架...因為我失去追巴士既能耐...代價真係好大呀...

之後我地透過各方途徑得到幾餅4x100m既playback做賽後評估,原來我個partner真係好堅!!!佢o係我心目中不嬲都係傻既,亦因為睇完playback我突然發覺自己好崇拜佢!!!不過最慘係睇到自己跑得真係好肉酸,仲要俾兩個同事前後包抄,爭d因為我而輸呀!!!好彩第三個接捧既家長一支箭咁帶離幾個身位我o地先可以拎到金牌,好險呀~~(-_-")

星期四拎住報團送既飛睇o左F.I.R.既演唱會,其實我係為o左孫燕姿先去既,哈哈~~估唔到拉闊既氣氛真係做得幾好,舒服過紅館呀!而且唱唱下仲有古巨基上台唱愛與誠,好抵呀!!!!!!!!不過孫燕姿一出場全場立即起哄,而且佢唱Live把聲真係好勁~聽講佢9月開演唱會,一定要睇呀!!!

星期五第一次去飲同事(阿汶)既喜宴,好開心呀~可能我恨嫁啦,一睇人地既video(即係童年照、拍拖照o個d呢...)我已經覺得眼濕濕,而且再聽埋新郎哥緊張到口窒窒o個一刻就覺得佢地真係好幸福喇~最重要係見到阿汶實現到我既夢想——好大個金豬牌同兩大抽龍鳳(金厄),好幸福呀~~~成班同事著得靚一靚好開心,不過爭d因為主任我地發生血案....佢地幫我同阿Grat霸o左位佢竟然坐低賴死唔走!!!所以我地不停逼迫新娘子趕佢走,苦戰一輪先成功!!!不過現場唔玩遊戲就悶到我地爭d訓著,唯有自己人不停起哄,一敬酒就發狂咁嗌,連校長都話我地呢班友黐o左線(好彩佢無講呢班友聽日唔使返工,係就大鑊...)一班人散場後慢步海旁搵巴士,而我就好努力組織畫面,就係我要搞一場喪玩婚宴,大家要好好準備一下,哈哈~~

歡樂過後既代價就係好晏訓~大家明明去飲o個陣仙女下凡,星期六返工就好似喪屍回歸,最慘係我仲要去西貢site visit!!!阿sir係全程non-stop咁講,坐都無得坐呀!!!搞到我返屋企坐車不停訓,亦因為咁個頭又撞到腫o左一大舊,唉...

不過玩樂最最最大既代價,係我o個3000字既assignment未搞掂呀!!!!!!!!!!!!!!!!