詳細檢查尪仔的狀況，三昧堂的造形師知影尪仔的問題了後，就愛一項一項來處理，伊講尪仔較濟攏是造形的問題，其中頭鬃上歹處理。

三昧堂創意木偶團隊造形師 王文志講：「這个頭鬃是一簇一簇來電，無可能會當規片來電，所以尪仔的頭鬃袂當直接電，速度就袂緊。加上閣愛有造形、掠角度，恢復原本的模樣，所以這會較費時間」

戲尪仔主的人 吳小姐講：「尪仔規个修復了後的氣色，或者是翕相出來的神情，會比進前較好看」

三昧堂表示，尪仔的造形攏是手工打造，時間一久，加減會有害去的情況，需要修理尪仔的民眾，攏是支持布袋戲文化的人，所以才會替逐家修理，這馬顛倒成做三昧堂另外一項誠重要的工課。

戲尪仔的主人 黃小姐講：「所有的人對IN的手藝，對IN對待尪仔的意愛佮態度，彼種熱誠，逐家攏講IN的技術誠好，對待尪仔嘛誠珍惜」

三昧堂團長 嚴仁鴻表示：「咱臺灣各縣市遮的支持者，有收藏尪仔的，IN的尪仔出問題了後，就是攏直接尪仔揹咧，駛車就是傱來嘉義縣表演藝術中心，揣阮幫IN修理。所以阮遮已經是臺灣唯一的，布袋戲尪仔病院」

團主指出，臺灣布袋戲的市場大約有一百萬人口，遮的戲迷收藏的尪仔有六、七十萬身（sian）左右，修理尪仔雖然予IN有機會熟似誠濟人，但是IN閣較希望，會當教民眾學會曉這个工夫，替臺灣布袋戲文化的發展，拍好基礎。