好想搵個窿捐入去,又或者呢埋入台底,總之可能將我同面前呢幾個人隔開就得。
如果係電視節目既話可能會係打格仔,不過係將我打格仔定係將佢地四個打格仔呢？
不如我份project係設計一塊隔人膜,可以將自己同其他人隔開,可以用蚊帳黎develop,又或者將打格仔同蚊帳mix埋一齊...
死喇,連我都開始講野夾英文......仲要唔知有冇用錯又或者串錯字,總之好想無啦啦夾d英文落去......

當羞愧到想搵窿捐既時候,我就可以打開呢個隔人膜,唔想比人見到自己,唔想見到人地,但係又可以繼續留係果個空間......

其實點解咁想搵窿捐仲要留係度唔走呢.......
雖然好難受,好想搵窿捐,但係我知道我留係度對我其實係有益,正所謂苦口良藥，同埋如果我走左去既話,我會更難再面對佢地。
其實喊都可以係一個化解招數,不過係仲有能力控制既時候,我絕對唔容許自己咁做!!!!!!!

唔明？唔明唔緊要,講到你明為止。
當你一個,坐係間房度比幾個人圍住黎插你懶,插你搵藉口既時候,正常人都可能心裡面咒佢地,如果我可以咁,我就唔洗隔人膜啦~
衰就衰在我無睇得自己個位咁高,我覺得佢地插得好中好岩,被插既過程中,我自己都唔想再作任何解釋,因為我覺得我一解釋就好似為自己狡辯,為自己搵藉口咁。
其實我自己都好憎人搵藉口,所以都會好憎自己。但係其實我都好明白搵藉口人既心情......

搵藉口都係隔人膜既其中一種存在形態,但係會比開一塊蚊帳出黎更乞人憎囉.......

而我想狡辯既內容,大致上係話我由細到大比人困係屋入面,而家大個左,繼續街都唔敢出,連同人接觸都覺得好驚,之所以我黎到黎黎去去都係去得果一個地方。
但係其實我敢去果一個地方我覺得自己已經好有進步架喇......
有時有d野無人話比你知點做,又或者無人做過比你睇,一舊爛紙巾好難會有一日靈感一到就識得自己去做。做一樣係有好多可能性,但係唔識又或者未試過,就真係唔知點埋手。

我真係太被動太細膽喇......
不過我知呢d都唔係值得願諒既理由同埋藉口黎既.......又係藉口......

係無阻住檔既情況之下,比人插到應一應既我,坐係針氈上面硬食左一餐,惡夢發盡咁訓左一覺,醒左,又要再面對佢地。
一pat係海面飄浮既爛蓉蓉既類似爛紙巾既野,比熱心人用救生圈用力一咪,結果就應該好似梁詠琪廣告入面果d黑斑咁,打散哂。
而家既我既感覺,就好似生意失敗咁,本來已經好大挫敗感既我,而家更想逃離呢個世界。

好想買果張ball chair又或平平地,搵張被笠住自己個頭過埋餘下既日子......
但係同時又好覺得自己有好多野想做未做又或者應該做而未做......

爭扎中......
我知我係要朝住後者方向,但係又好驚,之所以而家我仲坐左係度未返workshop,但係其實我知我會返,我而家應該要動身喇。

如果我可以過到呢機,我就可以升級架喇,加油。
車,乜咁悶架,呢排好似次次結尾都係咁上下模式......