近日買左本研究日本電影既書,其中有一篇係講電影「感官世界」既,比個機會我重溫阿部定既故事。
話說好耐好耐以前既日本,總之仲係周街有人著和服既時代啦,有個美艷而性慾極強既女子叫阿部定,係某個商人既二奶咁上下,呢兩條友每日瘋狂咁造愛。
某次,阿部定同姦夫玩SM,玩到整死左個姦夫,繼而手起刀落,切左亞姦夫個何B仔落黎. . . . . .
拿,而家點算好呢?咩都無得玩咯. . . . . . .你話幾戇居. . . . . . .

又話說,某日個岩岩去完日本既miss請我食粒係日本買返黎糖,好好味呀~
我嗒下嗒下,本能反應,一野落碎左粒糖,成粒糖化成碎片,糖味一湧而出,比之前慢慢嗒下嗒下更強烈地感受到呢粒糖既美味呀~
但係,拿!又黎到呢個位喇,咬碎左,粒糖溶得更快,話咁快,粒糖就係我口中消失得無影無蹤. . . . . . .
失落. . . . . .

成件事都好日本. . . . . .
日本戲,日本糖,日本美學. . . . . .
終極一詞我諗都係出自日文架啦可?其實呢兩個字夾埋係咪咁既意思呢?
終係最後,極係最大程度,最後既最大程度。

講返阿部定單野先,佢切左佢情人既何B仔落黎之後,立左隻何B仔,係鬧市度遊遊盪盪,過左幾日,就比差人拉左喇。
我諗佢係鬧市遊盪果幾日,心情應該都好似我咬爆左粒糖之後咁,失落. . . . . .