成日都聽到既一個問題,如果聽日就世界末日,你最想做既係咩事呢?
我既答案唔係環遊世界,唔係拿支槍去六福打劫順便掃射(雖然都有d想),始終我最想既,就係可以草齊我最愛既人一齊,開一個好開心既party。

其實呢個party都幾難發生,一黎草人呢樣野都幾難,一時又話呢個忙,一時就話果個忙,要夾岩時間真係好鬼難,個個都要為口奔馳；二黎通常最愛既人係埋一齊,都唔會幾岩玩。試諗下,你亞爸亞媽有幾可會同你d friends玩得埋假?就算可以草得埋佢地一齊,都未必會開心。

其實婚禮呀,壽宴呀,滿月酒呀既性質就係應該咁樣,草齊自己最愛既人一齊,玩返晚。但係而家果d咁既婚禮已經變成賺錢既機會,變成比d連佢性乜都唔知既親戚聚頭,要招呼呢個招呼果個(我好唔鍾意招呼呢樣野),又或者比d富貴親戚 show下野咁,再更慘既係會見到d自己憎既親戚,見到佢已經篤眼篤鼻架啦,仲要有機會比人見到自己拆開佢封雞碎咁多既人情既時候既醜惡樣,又何必呢？

如果我有機會搞個理想party既話,我一定要淨係請我最愛既人黎到,跟住逐個逐個介紹,因為我最貼身既人唔多,所應該會易玩埋d同埋好快介紹完；有我既家人,最好果幾個朋友,同埋曾經真心關心過我既人。比佢地互相認識,就算討論我都唔介意,因為我都想知係佢地唔同既人心目中既我係點樣,諗起都好開心呀~

如果呢個party一定要係結婚既話,咁我就希望我可以快d結婚喇,跟住等佢地識左既時候就可以多d約佢地一齊出黎,咁就變成以我為軸心既烏托拜喇,哈哈哈哈~
當佢地互相認識左之後,每一個又建立一個佢地既社群,跟住又再帶佢地既社群入黎,人數越黎越多,個個都係好人,咁就實在太好喇~

其實現實中最接近咁樣既情係有一次,不過就唔係一齊開party,而係我失戀既時候,我爹娘同埋我最愛果幾個friends係我屋企度睇我,不過果時淨係掛住傷心,都無把握機會同佢地好好咁傾下,哈哈哈,如果我果時突然間唔喊跟住即刻互相介紹咁就好笑喇~哈哈哈哈哈~

好啦,我會盡我既最大努力,令我呢生人既婚禮,我個B既滿月(如果嫁得出同埋生得出既話),壽宴等等變成我理想中既party架喇。如果我最後都係失敗既,唯有寄望係我既喪禮啦,咁就要拜託你地喇。話哂我都有份參加丫……哈哈哈哈~