我都算係一個幾保守既人。
我著衫有我既原則,要舒服,隱惡揚善同埋適當既時候作適當既打扮。
潮流野唔係咁岩我,因為我唔想同水坑尾d 妹妹仔爭衫著。
誇張野唔岩我,因為我覺得我都唔係差到要靠以誇張既衣著黎引開人地對我樣貌既注意。

平時返學返工,我老Tee牛仔褲,戴返個眼鏡,無化妝,無特別打扮,以最舒適方便既姿態去面對我既工作或者學業。
因為一黎我唔想比d無謂既事情阻礙我學野又或者做野,我認為工作既地方唔係我發姣既地方;
二黎,我個人認為,靚既野通常都好難好睇又好用,我自問就做唔到好睇又好用,所以我將注意力多d放係好用果邊;
三黎,如果要我將用黎化妝打扮既時間用黎化妝打扮,不如我用黎訓多陣又或者做好我要做既野好過啦;
四黎,化得妝多皮膚好快差架,雖然我而家都唔多好,不過點都好過再差d丫~
五黎,我唔係咁想出街同平時都係同一個look,我享受比人見到我著得靚d果時比人讚既虛榮感。
六黎,我覺得作平實既打扮,就好似將我地既作品表係一張黑色既咭board上面既原理一樣,凸出作品,而唔係凸出我個人。亦都係作為對自己既一種鍛鍊。

去街街既時候,我會除低個眼鏡,化返少少妝,著返女仔d既衫褲鞋襪。
尤其係同我爹娘去街既時候,因為我想人地讚佢地個女靚女。雖然多數都係假既,但係普通樣人地都會讚,如果真係太醜都真係好難講得出口家嗎,咁我起碼都做到ok果隻丫~我又無咩叻既地方可以值得佢地驕傲,咪唯有係呢度比人讚下等佢地開心下囉~
我好少著裙,唔係因為我果兩條腿唔靚,相反,我諗我果兩條腿可能係我全身最靚既地方,多得我娘既遺傳,佢地可以又幼又白又滑,我唔係唔鍾意著裙,而係唔鍾意著襯返條裙既女仔鞋。因為通常著女仔鞋都唔著襪既,卡到隻腳鬼咁痛~
我都話我係一個好保守既人黎架啦,我唔著背心同埋涼鞋,因為我覺得好無安全感,好似無著衫咁,我唔制~

我覺得,最緊要都係舒服同埋自我感覺良好,如果唔係著到幾潮幾型幾妖艷,但係唔慣,個人縮下縮下咁,只會令到自己暗啞無光。