我從來都係一個被動怪。
當我置身係一個陌生既地方，如果果個地方有我熟悉既人，而我熟悉既人又係多數族群既時候，我就可以好似平時對住Ｄ朋友咁，發癲。真面目表露無遺。
但係，當我置身係一個無熟人既地方，又或者識既人只不過係少數族群既時候，我就會嚴重自閉，係好嚴重添。搞到比人話我cool,其實我都唔係好cool姐,至少你同我講野我都會答返你丫,唔答你果隻先至叫做cool呀。但係可能我既外表搭夠啦,我個樣又真係惡到爆既......跟住個個都問做咩你個樣咁惡/cool/甚至係串......大佬,都唔想架喎,呢d唔係我揀架喎.......
正如我而家咁，岩岩去到一間公司做野，無一個人係我識既，我曾經都有主動咁想撩下人講野，人地講野既時候我又會搭下訕，但係，我發覺我講野好似無人聽得到，都唔細聲架喎，我咁樣主動左成個星期之後，我決定放棄喇。

其實，要我主動真係好辛苦，因為我根本就唔係一個主動既人。
個亞頭話要請d主動做野既人，但係我就係一個咁唔主動既人而我又去做呢份工，咁我係咪呃左佢呢?

算數啦。