25-6-08(五)7點幾時，阿媽同我講話停課，跟住我自己出廳睇親自睇下香港早晨o既報道先安樂，教育局宣佈學校全日停課，好野唔駛返工，安樂地再去瞓返。

10:57起身，本想瞓多陣，但諗住下午唔駛返工，不如下午先再瞓過，點知11:15天文台宣佈改掛3號風球，隨即收到阿Lo電話，佢話2小時內返工，呀…乜而家幼兒學校改由教育局監管後，3號風球都係要返，撞鬼咩!不過算啦!反正d仔唔返，我返去都係做自己野，整理下文件。都會好快過的。

係屋企食左個杯麵先，然後睇埋無線播緊o既新紥師妹，再打埋琴日o既日記，12:40就出門口返工了。擔心落大雨後，愛晨徑會水浸，所以都係撘車返工，出到商場等小巴時，又咁啱見到有架7B剛到巴士站，即刻跑去上車。

1:02落車，返左幾年工，都好似未試過坐7B返工。一落車，好大風，擔心吹爛把遮，索性唔開遮。去到學校後門時，又剛見到阿何回來，明明我上巴士時，阿何都未出門口，點解佢會咁快，原來佢係撘的士。

校長點幾返到來，就問我地攞外賣紙叫野食，佢地叫我，我又叫，但其實我唔肚餓的，但口痕想食西多士。

好彩D野食成2點幾先到，所以變相做tea。食完野開3:00開會，又話開1個鐘，點知開到4點幾，開完會我去滙豐銀行，企係對面馬路就睇住佢閂門，原來滙豐銀行是收4:30，激死我，出一出來，重搞到成身同鞋濕曬，但又去唔成銀行，早知去到銀行先打電話問少敏要換幾多錢，就因為係吉之島門口傾埋過電話先過來，就遲了，唉…明天再來。

本來5:30放工了，但Teresa話6:00先係太子走，所以我都6:00走，今日返工打了上星期檢討，打埋長幼才藝耀崇真o既檢討、換了兒歌紙同中文生字、整埋督學那天的教具。成果不錯。

同阿何、細黃5:55一齊走，諗住同阿何一齊坐6點零幾分的212巴士，一出校門阿何收到阿Lo電話話等埋一齊坐212。我地係巴士站排隊等佢。我同阿Lo一齊坐同傾計，阿何就瞓覺。我係QE對面下車，跟住行去商務搵埋Teresa一齊去金嘉利，實在唔肚餓，但都叫了個常餐：呢個餐好抵的，$29有一個豬扒公仔麵、粟米雞蛋奄列、香腸、西多同一杯熱飲。但係我只係食了豬扒、粟米雞蛋奄列、香腸同一杯熱飲就冇食了，從來都冇試過咁浪費。以前再飽都要食埋，就係唔想sign，而家真係轉死性了。

8點幾左右食完，行了恆豐半層就走了，因為冷氣實在太凍，我已經起曬雞皮。

跟住Teresa同我一齊行返愛民，佢再撘17號返觀塘。

9點前回家，起初重諗住返屋企早d執行埋先，但回到家實在太累了，睇睇下電視都已經呆左，合埋眼了，都係早d沖涼，跟住打埋日記就瞓。我已養好d精神，留番去旅行時用。行埋都係明天先執，這才是我本性，d野唔留到最後一刻都唔做。