17-8-07(五)今日發生左一件大件事，就係走失仔：

事緣今日係阿彭叫咪放學，新來的黃老師在5:05出來站崗，阿彭對她說要去廁所，上廁所後出來再同幾個家長寒暄之後，行返入學校，發現唔見左暉暉，問黃老師佢就話唔知：佢唔係放左學咩，阿彭話冇叫過佢放學，黃老師佢都無叫過，於是阿彭醒覺唔見左暉暉，即刻閂左度大門之後入番去搵，搵唔到，走番去廚房同大門口搵，咁啱有個小朋友o既媽咪嚟接放學，媽咪見阿彭咁嘅樣就問搵咩野，阿彭話暉暉，媽咪話佢上嚟之前見到暉暉係吉之島，然後問佢媽咪同姐姐呢暉暉無答,咁阿彭問佢係邊度，黃老師就叫媽咪帶阿彭去搵，去找暉暉時，原來佢已經落左去超級市場個層，轉左去機動遊戲個邊玩緊，帶左暉暉返嚟同放埋佢學之後，阿彭去話比校長聽。

校長問阿彭，阿彭就照直講：唔知暉暉幾時唔見，校長問黃老師，佢都話唔知暉暉幾時唔係度，黃老師以為佢已經放左學，一時就話佢去左攞塗改液，得阿彭一個係度，一時就話自己同阿Lo講緊野,一時又話度門大開，咁用時間去推測，校長離開大堂個時係大約5:05，校長見到我閂左一半門阿，阿Lo簽走個時係5:25分，阿彭搵番暉暉返上嚟，咁校長走左我先至去廁所,前後大約20分鐘,暉暉一個人走出去落樓梯再搭電梯到機動遊戲個度，再加上媽咪之前已經見到佢再搵返佢，應該係阿彭去廁所個陣時，但係黃老師重想話唔關佢事，一時又話今日唔係佢負責嗌咪，一時又話度門大開，去出左去都唔知，阿彭一直企係圖書櫃前，唔會走左仔都唔知，到最後校長話同Irene溝通後，估計係我去左廁所後，王老師同亞lo講野以致無留意暉暉走左，校長要求佢地都要寫報告，阿彭話只寫自己知嘅野，咁校長就話各自寫自己d野，校長都要寫報告，重講左幾次要聽比人炒，最估不到是黃老師講嘅野，佢好似想推卸多過會負責。

呢個老師真係唔多掂，佢個班o既暉暉同另一個新女成日都走出課室，係學校走來走去，我間唔中都會幫佢帶番d小朋友入課室，我都明白佢係新人，唔熟d小朋友，有小朋友走失係唔出奇o既事，亦希望佢日後會改善，但係睇小朋友玩玩具時就訓覺，呢樣野就唔啱啦!小朋友有意外，咁點算呀?佢今日睇小朋友時又訓覺，重要阿Lo / 阿彭幫手係大肌室帶番個小朋友入o黎，之後同阿Lo講開，諗緊點樣做，同校長講就好似好俾機會佢咁，阿Lo先話如果再見到佢訓覺，就問下佢係咪好眼訓(當係提下佢。)

但見到今日發生o既事同埋佢既態度，真係對佢有點失望，如果校長開會時攞呢樣野出o黎講，我都會講番佢睇小朋友玩玩具時就訓覺o既行為，有意外時點算呀?每一個人都應該為自己o既行為後果負上責任。做人點可以冇事由自可，有起事上來就卸。

本來放工5:00，我想答5:10既車回家休息下，然後7:30返安素聽紅色門訓簡介會，但係陽陽爸爸接近5點先o黎學校，教我將DV機o既碟format，同埋試下整下部電視機(因裝修返o黎後，部電視就開唔到，我就心知我一定不能上到5:10既車回家，等陽陽爸爸整曬d野差不多5:30走，跟住校長就叫左叫阿彭同黃老師入房傾計走失件事，我就幫手睇門口，去到5:45左右，我見個仔又去話俾校長知，我要走了，叫佢搵番個老師出o黎看門口。

後來因同阿彭、細梁傾番頭先發生既事，然後先走，去免費巴士站想上6:10既車回家，可惜太多人上不到，最後決定唔返屋企，直接出油麻地，6:15上車，6:40就下車，少可wor，今日係星期五，重要呢個鐘數，但都冇咩塞車，因為早左下車，我去通達食住野等佢地，食生菜魚肉翅，同炸豆腐和魚旦，生菜魚肉翅麻麻地，炸豆腐就好脆，魚旦都好好味。Phoebe、Mandy到來時，冇咩位，我又差不多吃完，所以Phoebe決定買野返教會食。

聽完門訓簡介，我知自己一定會上，因為今年的確係讀門訓既好時機，因唔駛進修，唔駛擔心d course撞上堂。雖然曾經諗過補課要一齊補，會好麻煩，同埋sign時間，亦可能因為人既因素唔想上。Anyway最終都係決定要讀，希望會6個人開得成班，但我又從未擔心個開唔成班個問題。

聽完接近九點，回家了。