2024-12-22 16:58:19Tong-îng Lîm
閉思pì-sù
閉思pì-sù
佇Netflix 看日本電視劇「南極大陸」，這齣戲咧講日本戰後1950年代到南極探險的代誌。戲中男主角倉持岳志（木村拓哉演）佮女主角高岡美雪（綾瀨遙演）兩个人互相攏有意愛，毋過攏毋捌表明心意。關心美雪的人是定定紹介人叫伊去相親，美雪相親的代誌倉持嘛知影。
倉持第一擺去南極閣預定欲蹛一年，欲去進前去佮美雪相辭，咱是想講倉持是查埔人應該會開喙表明。美雪是硞硞仔等，等規埔倉持干焦講一句：「我來去！」嘛是無開喙表明。一年外倉持對南極轉來了後，嘛是無開喙。一直等到第二擺欲閣去南極的時，有一个倉持向美雪相辭、倉持向美雪表明心意的場面（scene）。倉持是講按呢「請你等我，就莫閣相親矣--------請你等我。」台灣的觀眾應該是真袂當理解，直接講就好矣！按呢講對方敢會當了解？
其實，咱台灣查埔人嘛是仝款，上少阮老爸彼代以前的台灣查埔人是按呢，我這代一半以上的查埔人嘛是仝款。毋捌開喙向牽手講過「我愛你」這个詞的。
現代的日本少年人就無仝款囉，有足濟人已經是佮現代的台灣人仝款，西洋人是綴甲著著矣！攏是誠勇敢表達愛意，逐工共「我愛你」這个詞掛佇喙，甚至是講甲強欲臭酸！干焦是半世紀的差爾爾，就親像是無仝的世界。
（241222Tong-îng）