人客的服務無簡單02

   航空公司載客的班機頂懸，第一線面對人客的員工一般是共叫做「空中小姐」、「空中少爺」。這个名實在是誠奇怪！明明是佇飛行機內底，汰會叫做「空中」？曷「小姐」、「少爺」應該是人來共伊服務的啊！

     佇「空中」的小姐、少爺，到底是做啥物工課hannh？人英語是叫做「cabin attendant」抑是叫「flight attendant」就是載客班機客艙的服務員。就是航空公司載人班機內底，第一線面對人客的服務員。應該是叫做「班機服務員」簡稱「機員」才較合軀。（佮咱共店裡服務的人叫做「店員」是仝理路）。咱就隨俗共叫做「空中服務員」，簡稱「空服員」。

   因為是佇飛行機頂服務，若是國際線就會拄著各國的人客，就按呢對「空服員」的要求條件就較懸。譬如要求學歷、外語能力，較早甚至要求身材愛好，身懸著幾公分以上，尪仔頭著媠，未婚。毋過我就袂了解：人媠，人懸，身材好，無結婚，伊的服務敢就會較好？ 我佇歐洲、美國，捌看著真濟身材是我的兩倍大、阿媽級的空服員，服務嘛袂䆀啊！

  毋管少年的，老的，媠的，䆀的，服務的本質是仝款的。攏著應付千千萬萬無仝款的人客，啥物洲來的人攏有，當然嘛有「漚」洲來的。

  30幾年前，我一个老朋友生理做真大，美國市場是伊上大的市場，定定愛走美國。伊一向攏是坐咱國A航的飛行機。有一擺去美國，佇到欲第二擺食飯進前，伊耳空誠利，聽著遠遠傳來空服員講話的聲：「Tsài lâi iâng tsu loh！」（Koh lâi tshī-ti ooh！）。伊聽著，以後是拍死嘛無欲閣坐A航的飛行機矣。

  當然30幾年前的空服員攏會予人感覺是高高在上，驕傲無比。現此時已經是無仝款矣。最近有一擺佮人講著空服員的服務，一位朋友是咱國B航的忠實顧客。B航的服務一直是予人足感心的。毋過，伊最近有感覺：少年空服員是誠頂真、服務較周到。顛倒是拄著一位資深的空服員，態度無好閣予你感覺真無用心。

 認為學歷較懸、素質較好，較資深的員工服務會較好、較放心，這是無的確的！服務主要是愛有心，時時刻刻徛佇人客的立場，用心服務。

  講著服務我攏會請逐家著向：「菜市仔排擔仔，賣幾若十年的頭家娘學習！」

   （241108Tong-îng）