2024-11-28 15:55:03Tong-îng Lîm
芥川龍之介短篇小說「女仙lú-sian」
芥川龍之介短篇小說「女仙lú-sian」
古早古早 ，清國（支那）的某田庄蹛一位書生。因為這是清國的代誌，伊應該是一直佇桃花當開的窗仔跤咧看冊。書生的隔壁是蹛一个少年查某人——生做誠媠的查某人，無請查某𡢃仔是一个人蹛。書生當然對這个少年查某人是感覺真奇怪。實際上是因為無人知影這个查某人是啥物身分，是靠啥生活的。
無風無搖的春天， 有一个欲暗仔時。書生行到外口，雄雄聽著少年查某人罵人的聲。而且是佇厝鳥仔是規陣消消遙遙、吵吵鬧鬧的時陣，就聽甲愈清楚。書生那想講這到底是按怎，那行到隔壁查某人的厝欲去共看覓。看著查某人是氣怫怫，共一个有歲的剉柴的老大人揤牢咧，對白蔥蔥的頭殼是一直揍（bok）一直拍。而且剉柴的老大人是目屎那流，頭殼犁犁那咧會失禮！
「曷這到底是按怎hannh？對一个老大人莫共拍甲按呢，敢毋好？——」
書生是共查某人的手揤咧，誠熱心咧共勸。
「第一，拍年歲較大的人是違背修身的道理。」
「拍年歲較大的？這个剉柴的是比我較少歲neh！」
「莫講耍笑！」
「無，無講耍笑！因為我就是剉柴的阿母！」
書生聽一下人隨愣去，掠著查某人的面一直繩。才共剉柴的放掉的查某人是生做足媠的，——應該著講彼个威嚴的面容顯出血色，目睭是連𥍉半下就無，就按呢講：
「我為著這个囝，毋知是受過偌濟苦。這个囝就是無欲聽我的話，一直是放放放（pàng-hòng-hòng），就按呢到這个歲數矣。」
「按呢，-----這个剉柴的應該欲七十歲矣honnh！曷你這个剉柴的阿母，你到底是幾歲hannh？」
「我hioh？我是三千六百歳。」
書生聽著隨悟著這个隔壁的媠姑娘是仙。不而過，就佇彼个時陣，彼个面容威嚴的查某人的形姿，就已經毋知走去佗位，無看人影矣！只賰拖甲長長長的春天的日頭光，照著的彼个剉柴的老大人。 （了）
「女仙にょせん」是芥川龍之介 1927（昭和二）年二月的作品。
台文翻譯 Lîm Tong-îng
***刊載佇《海翁台語文學雜誌》275期，2024年11月