2024-10-23 12:31:15Tong-îng Lîm
芥川龍之介短篇小說「田蛤仔 tshân-kap-á」
「田蛤仔 tshân-kap-á」【 全文】
水池仔邊是規片旺旺的蘆竹佮ka-tsì-tsháu（蒲草），蘆竹佮ka- tsì-tsháu閣過去是路樹、懸懸的白楊樹，予風搖甲是誠有品。較過去彼爿面就是恬靜熱天的天頂，一片幼幼仔、親像玻璃片仔的雲尪一直咧爍咧爍咧。遮的閣總印佇水池仔，是比實物閣較媠。
田蛤仔佇水池仔內底Ko-ro-ro，Ka-ra-ra叫無停，規工長落落就是叫袂懶。小可仔共聽一下，干焦聽著Ko-ro-ro，Ka-ra-ra爾，猶毋過，𪜶實在是議論甲鬧熱滾滾，田蛤仔開喙無的確只是咧談論伊索（Aesop）時代的代誌。
歇佇蘆竹葉仔頂懸的田蛤仔，用大學教授彼款的口氣講：
「水是為著啥物存在的？是為著予咱田蛤仔泅水的。蟲豸（thâng-Thuā）是為啥物存在的？是為著予咱田蛤仔食的。」
「Hi-a-ya ，Hi-a-ya」水池仔的田蛤仔叫出聲。佇有天頂佮草木反影的水面，齊是一隻仔一隻的田蛤仔，𤲍甲實捅捅（tsat-thóng-thóng），贊成的聲當然是大甲無底講。拄好佇彼時，一尾蛇踮白楊樹頭咧睏，予這款吵人耳的Ko-ro-ro、Ka-ra-ra的聲吵精神，就共伊鐮力仔形的頷頸那攑予較懸，目睭對池仔彼爿瞭過去，猶是愛睏愛睏，舌伸出來共喙唇抐抐咧。
「塗是為著啥物存在的？是為著草木生長的。按呢，草木是為著啥物存在的？是為著共咱田蛤仔遮蔭的。」
「Hi-a-ya ，Hi-a-ya」
蛇是聽著第二擺的賛成聲，隨共身軀親像牛捽仔按呢捽出去，紲落來就那沓沓仔趖到蘆竹內底，那共烏目睭展予較開，足頂真咧偷看水池仔內的情形。
蘆竹葉仔頂懸的田蛤仔，猶是大喙開開議論甲鬧熱滾滾。
「天是為著啥物存在的？是為著欲掛太陽的。太陽是為著啥物存在的？是為著共咱田蛤仔的尻脊骿曝焦的。遮的水，草木，蟲豸，塗，天，太陽攏是為著咱田蛤仔存在的。天下間宇宙萬物攏是為著咱的這个事實，是一點仔就毋免懷疑
。佇遮我欲向各位講清楚，同時欲向全宇宙為著咱所創造的眾神，致上誠心的感謝。讚嘆眾神之名。」
田蛤仔面向天，共目睭仁轉一輾，紲落來閣共喙大大大擘較開，講：
「咱愛讚嘆眾神之名------」
這句話都猶未講完，想講蛇頭干焦是伸長欲共碰一下，就佇這一目𥍉，這隻雄辯的田蛤仔予蛇喙欱（hap）去矣。
「Ka-ra-ra，不妙啊！」
「Ka-ra-ra，不妙啊！」
「代誌大條啊！Ka-ra-ra，Ko-ro-ro。」
水池仔的田蛤仔驚一趒大聲嚷的時，蛇是共田蛤仔欱咧趖入去蘆竹內底。紲落來的彼款滾絞，應該是有水池仔以来猶毋捌有的，我佇彼內底聽著一隻少年田蛤仔是嘛嘛吼四淋垂，那咧講遮的話：
「水，草木，蟲豸，塗，天頂，太陽攏是為著咱田蛤仔存在的，按呢，蛇到底是啥物咧？蛇嘛是為著咱存在的hioh？」
「是啊！蛇嘛是為著咱存在的。蛇若無共咱食去，田蛤仔一定會繼續增加，若是一直增加，水池仔，——世界一定會愈來愈狹。所以，蛇就來食咱田蛤仔。夆食去的田蛤仔是為著咱濟濟田蛤仔的幸福來犧牲的。著啦！蛇是為著咱存在的。天下的萬物攏是為著田蛤仔存在的，咱愛讚嘆眾神之名。」
這是我聽著的，應該是一隻年歲較大的田蛤仔回答的。 （了）
「蛙かえる」是芥川龍之介 1917（大正六）年九月的作品。
（241021Tong-îng）