2024-10-15 17:01:41Tong-îng Lîm
日本：「街の本屋さんを守れ」（「保護街仔的冊店」）
「街の本屋さんを守れ」（「保護街仔的冊店」）
【文藝春秋 2024年10月号p288-295】的一篇對談，是「齋藤 健/ 経済産業大臣（前任）・衆議院議員」，「今村 翔吾/ 作家兼冊店經營者」，佮「三宅 香帆/文筆家、書評家」這三个人的對談。
文藝春秋會做這个主題，應該就是日本的冊店，主要是小型冊店（「街仔的冊店」）一直咧消失，已經是誠嚴重矣。
一、日本冊店的現況
-1， 2023年日本全國的冊店總數是1萬九百十八間，已經低到2萬間以下，20年就減甲賰一半。就是一年有400-500間冊店關起來。
-2 ，2024年3月日本全國的自治體「冊店Zero」(無冊店)佔27.7%（超過1/4）。「冊店一間以下」佔47.4%。這是全國的平均數字，實際 上較嚴重的所在：沖繩，長野，奈良這3縣，有一半的自治體是「冊店Zero」(無冊店)矣。 （注：日本的自治體：就是二級行政區（即市區町村）量約仔有1741个）
-3 経済産業省對「街仔的冊店」的經營實際調查實例
東京的某小冊店，較早一工的營業額量約是30萬箍（日本錢），現此時 已經降甲賰10萬箍。冊店的毛利一般是20%，就是一工的毛利有2萬箍，一月日就是60萬。毋過厝租著愛55萬。雖然冊店是佇車頭前的好所 在，這款的生理是連家己就飼袂飽，汰做會落去。
-4 日本小型冊店經營困難猶有一个原因：日本有一个制度就是「再販價格維持制度」就是冊著照訂價賣。毋過，線頂的冊店（Net書店）當然是照定價賣，毋過𪜶用「集點」佮「免運費」變相的降價，就造成無公平的競爭。
二、経済産業大臣（經濟部長）參加對談主要的原因
2017年日本有一陣國會議員成立「街の本屋さんを元気にして、日本の文化を守る議員連盟（予街仔的冊店有元氣，保存日本的文化的議員連盟），這位齋藤大臣就是成員之一。就是欲保存日日減少的「街仔的冊店」。
通常冊店是屬文化，歸文部科學省（教育部）管的。毋過，過去日本的小說漫畫佇世界有出名，遮的contents(內容)所帶來的經濟效果誠大，経済産業省（經濟部）就共當做一个產業來對待來協助。就建立一个中小企業的「事業再構築補助金」的制度。這嘛是経済産業省實際調查街仔的冊店的經營情形，發覺銷售減少，顧三頓就強欲食袂飽矣，哪有可能應付環境變化的對應所需要的新投資？政府就編預算來補助。
*****
筆者注：看冊人口減少，線頂冊店出現造成冊店經營袂落去是世界共通的問題。各國攏有無仝款的問題，文藝春秋這篇對談是講日本的問題佮對策。筆者捌節譯過一篇NHK「韓國的冊店咧增加」的報導（囥佇留言）。
日本佮韓國攏共冊店認定是「contents(內容)產業」的第一線重要的角色，袂當予無去。咱國嘛共「contents(內容)產業」列做國家政策，期待有誠好的成果。
（241008Tong-îng）