2024-09-15 16:52:43Tong-îng Lîm
芥川龍之介短篇小說「悪魔Ok-môo」（台文版）
「悪魔Ok-môo」
聽講Ù-lù-káng神父的目睭會當看著一般人看袂著的物件。特別是對地獄來的、欲來誘唌人類的惡魔形姿是看甲足清楚，——Ù-lù-káng的青色目睭所看著的人人攏信甲神神。至少來參拜南蠻寺耶穌基督如来（3）的信徒是一點仔攏無懷疑也是事實。
根據古鈔本的記載，Ù-lù-káng捌佇織田信長（おだ のぶなが）的面前，秉報伊佇京都街市看著的惡魔的情形。彼就是「人的面，密婆的翼，山羊的跤」的怪奇小動物。Ù-lù-káng定定看著這个惡魔，佇塔的寶輪頂懸咧拍噗仔跳舞，或者是驚見著日頭光就跍佇四脚門（4）下跤的恐怖形姿。毋是，毋但按呢，聽講有當時仔是吸佇山野的法師尻脊骿，有當時仔閣是吊佇天皇隨身女官的的頭鬃。
不而過，遮的惡魔內底，咱上蓋趣味應該是疊環坐、坐佇某公主轎頂的彼个。古鈔本的作者是共理解做：這个惡魔的故事是咧供體Ù-lù-káng。——信長有一時是咧佮意這位公主、硬欲叫伊同意，猶毋過，公主本人佮𪜶爸母攏無想欲答應信長的願望。就按呢，Ù-lù- káng為著公主，按算欲借惡魔的喙來勸信長，叫伊就莫遐爾仔壓霸。這个解說是正確抑毋是？一直到今仔日，猶是無遐爾簡單確定，同時這對咱嘛毋是蓋重要的問題。
有一工欲暗仔，Ù-lù-káng佇南蠻寺門口，看著一隻惡魔坐佇彼个公主的轎頂。猶毋過，這隻惡魔佮其他的無仝款，面容媠甲親像玉仔，不而過，雙手是相尋佇胸前、頭殼犁犁犁、應該是深沉咧煩惱代誌。
Ù-lù-káng注意著公主的安危，公主佮𪜶爸母攏是虔誠的天主教信徒，若是去予惡魔迷去就代誌大條。就按呢，神父行倚到轎邊，隨用神聖十字架的力量，一下手無蓋費氣就共惡魔㨑（tsang）起來，對衫仔裾㨑咧掠到南蠻寺的本堂。
本堂的主耶穌基督畫像頭前，臘燭火著甲那咧衝烏煙。Ù-lù-káng叫惡魔跪佇畫像的頭前，嚴格詳細問伊是按怎會坐佇公主的轎頂。
「我是想欲予彼个公主墮落，猶毋過，同時閣想莫予公主墮落。看著彼款清淨的靈魂，汰會當予地獄之火共穢稅咧！我一心想欲予清淨靈魂的烏影消失去。猶毋過，愈按呢想，彼種想欲予伊墮落的心就愈衝起來。我坐佇轎頂，佇這兩个心情之間那咧躊躇的時，那深深的想起阮的運命。若毋是按呢，我會佇你來到位進前鑽入去塗底溜旋去，就袂拄著這款的操煩代誌矣。阮一直攏是按呢，愈無想欲予伊墮落，就愈想欲予伊墮落。親像這款的想袂到的傷悲，別位敢猶有？我見若拄著這種傷悲，較早看著的天國明朗的光佮這馬看著的地獄的暗烏，就會佇我小小的心肝底結做一虯（khiû）。請你就憐憫這款的我，我是孤單稀微甲揣無步數。」
面容誠媠的惡魔話講煞，目屎就津落來。-----
古鈔本的傳說就無寫著這个惡魔後來是變做按怎，猶毋過，這對咱敢有啥乜牽連？咱讀著這个傳說的時，若會生出想欲做這款呼籲的心就會使得：
「 Ù-lù-káng喔，請你著憐憫惡魔佮阮，阮佮惡魔是有仝款的傷悲。」 （了）
譯注
1.「悪魔あくま」，芥川龍之介一九一八（大正七）年六月的作品。本台譯文稱「惡魔Ok-môo」。
2. 伴天連うるがん（ばてれんうるがん）：伴天連是葡萄牙語「Padre」的日語漢字，本文稱「神父sîn-hū」。うるがん，神父的名，本文稱「Ù -lù-káng」。
3. 泥烏須如来デウスにょらい：「耶穌基督如來」。應該是芥川仿「釋迦摩尼佛如來」外來的宗教名，所號的基督名。
4. 四足門，四脚門（よつあしもん）：日本的門的建築様式。
（刊載佇2024年8月號《海翁台語文學雜誌272期》）
（240905 Tong-îng）