2024-09-02 18:47:32Tong-îng Lîm
兄弟燃菅蓁，同姒仔燃草絪
兄弟燃菅蓁，同姒仔燃草絪
（Hiann-tī hiânn kuann-tsin， tâng-sāi-á hiânn tsháu-in）
較早阮A̋u（阿母）誠無佮意去講著兄弟、同姒仔之間的代誌，見若講著有當時仔就會落出一句「兄弟，兄弟燃菅蓁啦！」。這兩句話是講兄弟之間、同似仔之間的燒度。菅蓁燒起來猛是猛，毋過誠緊就化去，草絪若稻草做的，燒起來比菅蓁閣較緊化去、足無擋頭的。
兄弟是仝腹生，自細漢就做伙食、做伙睏，做伙大漢的，通常感情會上搭粒，真相好、真燒烙。不而過，同姒仔就無仝款，本成就是無熟似的人，只是嫁到仝家庭、食仝坩飯，個性無仝，袂合是真四常的。
現代人有較好無？ 人性若無改變，智慧若無提升，古早人所供體的佇現代仝款看會著，看起來閣無輸較早咧，親像：「怨嘆爸母大細目，甕肚啥人錢趁較有，窮分飼爸母的代誌等等。仝款是窮分來窮分去，怨來怨去規大捾。」
當今的法律閣是明定財產查埔查某（兄弟姊妹）平分。分財產的時陣，毋但是冤家勞債，吵家抐宅，較嚴重的閣有攑銃相相（sio-siòng）、相彈的。咱祖先就閣有這句話留予咱：「爸母在是兄弟，爸母亡變親情」。
時代咧進步、人類的智慧咧成長，照講無好的是會共做糞埽拚挕捒，毋過，人類的智慧若拄著人類「利己的本性」就會轉彎，會共當做無看著、共迒過。誠不幸咱祖先留予咱的話，恐驚攏會閣傳落去，萬年久遠。
*** 這句《教典》佮陳主顯先生「台語俗諺語典」攏無收。
蕭藤村先生「臺灣話俗諺語典」是收「兄弟燃菅蓁，兄嫂燃草絪」
注記：
1. 菅蓁kuann-tsin ：芒草，禾本植物。
2. 同姒仔tâng-sāi-á：妯娌。稱謂。兄弟的妻子彼此互稱。
3 .草絪tsháu-in：稻草或蔗葉等捆成束，用以作為燃料。
（阮A̋u（阿母）的話17 Tong-îng24822）