2024-08-22 21:37:29Tong-îng Lîm
台語人的一工
台語人的一工
頂幾工佮牽手想欲看奇美博物館的【從拉斐爾到梵谷：英國國家藝廊珍藏展】。這个珍藏展誠交易（ka-ia̍h），聽講二三個月前著愛先買票。臨時臨曜買無票，想講到現場試看覓。
高鐵台南站落車，隨行倚坐計程車的所在，隨就聽著用華語咧招呼人客，隨予我感覺礙謔，遮是台南neh！應該是會聽著台語的招呼才著矣！？看著彼个人喙仔笑hai-hai，我就笑笑仔共講：「台南人台語遐好聽，用台語招呼啦！人客若是聽無才改華語就好矣！」伊聽了後，隨轉做輪轉的台南腔講：「著，以後就改用台語！」。-----以後有人到高鐵台南站坐計程車，請你替我確認看成果按怎。
館內時間到，就到館外佮公園行行看看咧，台南的日頭斜西，有日花仔的樹跤散步有特別的感覺。同時欣羨台南人，有這款好所在，台南市民博物館閣是免費。閣予我想著奉獻博物館的前輩企業家、尊敬的許文龍先生，同時想著𪜶仝代的企業家，-------
轉去以前就先來共暗頓解決。佇餐廳，查某囡仔店員看阮用台語咧講話，捀菜到位講：盤仔有較燒請細膩！聽著「細膩」二字是予我驚一趒，誠久毋捌聽著人講這二字矣，閣是少年輩。就呵咾伊台語講甲足老（láu）咧，伊講因為厝裡攏講台語，談仔談我紲喙講：有一種台語測驗會當來看你台語有偌老！伊的反應看起來是毋捌聽過「台語認證」，順紲介紹教育部佮成大的台語認證，鼓勵伊學台文。
佮伊話講煞，隨予我閣驚一趒：查某囡仔店員翻頭到別桌，佮一對翁仔某講話隨改用「華語」，因為彼對翁仔某是用華語問伊的。代誌猶未煞！查某囡仔店員一行離開，翁仔某隨用台語講話。這是幸抑不幸？幾分鐘內我就看一齣「越頭族」的大戲。
問題毋是查某囡仔店員，伊是為滿足人客，用人客講的語言回應是服務必要的。彼對翁仔某，會曉講台語，互相講話嘛用台語！汰會對外人隨轉用華語咧？
母語就是聽爸母，聽捌人講話自然學會曉的。遮的會曉講的這陣人無欲講，下輩的哪有機會學咧！欲復振「講母語」著愛會曉講的人開喙講，毋管佇厝裡，無論到佗位，對啥人攏講台語，予下輩的有機會。
先共得著「越頭族」症頭的人治好，應該是當今台語復振上要緊的。
（240817Tong-îng）