2024-08-19 09:28:13Tong-îng Lîm
讀初中拄著的生活衝擊
讀初中拄著的生活衝擊
小學出業離開鄉里到清水中學（清中）讀初中，隨拄著台語腔口差的衝擊，同時嘛拄著濟濟佮本成原鄉的生活無仝款的事件，這應該是號做「生活文化的衝擊」。初離開家鄉隨拄著是感覺較新鮮、衝擊較大，到今就超過一甲子矣，猶是記甲牢牢牢。
清水有空軍的眷村號做「銀聯二村」，清水中學後壁的鰲峰山閣過去就是清泉崗空軍基地。阮同學有真濟蹛眷村，我後壁一號姓朱就是。入學了後隨體驗著眷村的囡仔佮阮做田囡仔的生活是完完全全無仝！小學的時雖然有兩个外省同學，毋過人傷少就無感覺有啥差別。
有一擺佇籃球場耍籃球，聽著：「啊！有了！」，就閣隨聽著：「有了！打掉啊！」這兩句一聽就是外省腔的「國語」對捌的球場傳過來，阮看著一个同學咧「遠投」。彼當時聽著當然是毋知啥意思，後來問同學才知的（就是佮查某囡仔交往，若查某囡仔有身就共拍掉（提掉））。真久真久以後，捌閣想著這項代誌就認真共想：做田囡仔有讀冊的嘛是大大細細攏愛鬥做工課。畢業了後，毋是綴爸母做工課，無就是出外學師仔、抑是做工課無佇厝咧，誠罕得看著規陣囡仔做伙耍、做伙嚾（uang）的。眷村的囡仔應該就較免鬥做工課，應該攏是規陣囡仔做伙耍，而且較大漢的若是無出外就會做伙透濫，仝沿的囡仔得著的智識比阮做田囡仔是加足楦闊。這項代誌對我這款閉思的田庄囡仔是足大足大的「生活文化的衝擊」！
閣來，讀冊了後就知影同學的老爸真濟是軍人佮公務人員，閣有聽著軍人佮公務人員的子弟有免學費的制度。阮做田的老爸是為著我的兩百八十箍的學費，愛了誠濟心思飼豬來賣，做學費，曷人是一箍銀就免！這嘛是一種生活環境的差別，嘛是一種足大的衝擊。
我初中三年實在講是無偌認真讀冊，成績就普普仔。數學較好淡薄仔，初三的時捌代表班裡參加三年級的數學比賽。以外就是對歷史、地理較有趣味，這敢是天生的、註好好的？後來出社會，愛看冊嘛攏是歷史相關的冊。初三教阮歷史的是曹宏澤老師，應該是上課的時陣，老師問問題我定定答著，會記得有一擺我答著了後，叫我去頭前，就共我攬咧，唚我的喙䫌，老師應該是足歡喜的才按呢。彼予我是大大驚一趒，因為到彼个時陣，我猶毋捌予長輩攬咧唚過，對我是一種文化的衝擊。
（到了真久以後，應該是這一二十年，才知影曹宏澤老師就是有名的曹興城先生的令尊。曹興城先生加我三年，伊高中就無佇清水中學讀，阮毋捌仝時間佇清中讀冊。）
幾若十年的人生行過矣，這馬共想起來，這款的衝擊，只要人活落去是一直咧發生的。特別是較有挑戰性的人，較愛接觸新事物的人應該隨時就會拄著。人講一步一跤印，行過的跤印，拄著的衝擊應該已經深深的刻佇我的身上，一定予我的人生有誠大的影響，有形的、無形的顯現佇我的行為。
（240809Tong-îng）