2024-08-18 09:26:02Tong-îng Lîm
台語腔口的經驗
台語腔口的經驗
我佇12歲離開鄉里大肚林仔頭到清水讀初中，離開個個事項、習慣所有一切攏四序、慣勢的所在去到外鄉，人、生活習慣、言語攏無仝款，彼款的衝擊毋是小可仔，到今就遮爾久矣，猶是親像昨昏才拄著的！
頭起先就拄著台語的腔口差，清水才離20公里遠就有台語的腔口差，當然當時毋知有這款的腔口差。入學無偌久，毋知按怎佮同學講著食飯，在地清水的同學就講「食mai」，第一改聽著是完全捎無貓仔毛，後來才知影原來阮講的食飯（pn̄g）𪜶是講「食mai」，曷食糜講做「食bêr」。（阮是講糜buê，佮「煤」仝音。）
紲落來，初中畢業後去彰化高工讀冊，學生主要是彰化為主。因為阮林仔頭庄到彰化市才7公里，生活主要攏是佇彰化出入（顛倒無佇平遠的大肚街仔出入），講話的腔口嘛仝款。毋過，彰化縣就有濟濟的腔口，倚山的就是火車路沿線彰化、員林的腔口就相𫝛，海線地區就閣無仝款矣。譬如鹿港、福興的「鹿港腔」，猶有台灣獨一無二的「永靖腔」。阮同學的腔口就來自四方，誠趣味！毋過，南投的同學腔口就佮我較相𫝛。鹿港腔是通人知，有伊濟濟的的特殊講法。拄聽著永靖的同學講「永靖腔」的時，實在講只有「著驚」兩字。
【借用「彰化縣永靖鄉共好協會」的紹介：永靖鄉的「永靖腔」拼音是Éng-tsēng-hiang，教典是Íng-tsīng-hiong。永靖的名句「永靖枝仔冰，冷冷冰冰」，永靖腔的念法是：ián-tsiān ki-á-pian，lián-lián tiān-tiān。 冷líng 念做「lián」，冰ping 念做「pian」。】
不而過，我讀初一的時，佇清水就拄著海口腔的衝擊，這擺拄著無仝腔口就無遐爾仔刺激，較平靜接受，閣學著有遮爾無仝的腔口。
後來到台北讀台北工專，同學是對台灣各地來的，就閣知影也學著各地的腔口。譬如講「宜蘭腔」，現此時消息誠流通，逐家攏知影「宜蘭腔」袂感覺奇怪！彼時一个18歲的台中囡仔，頭一擺聽著彼種腔口，嘛只有「著驚」兩字。同學有台北大漢的台北腔，有屏東來的腔口，台東的客人同學佇花蓮讀冊講的腔口，濟濟台灣各地的腔口-----
語言的腔口就是生活，生活就是文化。台灣遮爾狹就有遮爾濟腔口，就表示有遮爾仔濟的文化，這款豐富的文化是咱的福氣。
我佇成長的過程就拄著台灣各地的腔口，享受著這款福氣。同時捌蹛過新竹，長期蹛過台北，予我對無仝腔口攏袂有排斥、袂感覺奇怪。到尾仔是聽人講話就量約仔臆會出腔口。毋過，外口蹛久，雖然一直咧講台語，實在講，較早期對家己的台中腔，嘛毋是蓋有自信，就按呢家己的講話「台中腔」就沓沓仔無去矣。現此時已經毋知家己到底是啥物腔矣！「台中腔」上明顯的就是「尾音掠懸」佮「無第8調——第8調是念第4調」。
不而過，開始學台文，到這馬咧做台譯——芥川龍之介經典小說等等的台譯，佇咧查《教典》的時，就自動走出「台中腔」，這予我真奇怪，有當時仔嘛會有小可仔困擾。毋過，佇咧回想較早是按怎用、按怎講的時，想著的、走出來的攏是故鄉的話語，故鄉的用法。這敢就是人講的「離鄉無離腔」？
我是台語講規世人，佇離開鄉里去讀冊的時，就有福氣拄著、知影各地的腔口。閣毋知啥因緣外鄉蹛誠久，台語就有機會佮人透濫。遮的攏總已經是變做我的資產，現此時共人生最後的日子奉獻予台語文佮台譯，這應該是老天早著注好的！
（20240805Tong-îng）