1月20日是大寒，我同爸爸哥日又再次北上，今次任務係去做年度身體檢查。哥日真不愧為大寒，氣溫突然下降，本來朝早著單薄d 的衫都ok，但到左下午就開始感到寒風刺骨，天空且下著綿雨，呢d 就正一「陰濕」天氣。

話說我外公同個內科主任相熟，於是11點到步後，半個鐘就check 哂，認真快趣。之後大家就一齊去食飯，哥陣有我、爸爸、舅父、內科主任&佢屋企人、另一位醫生、我公公，大約十人就一齊開中午飯局。

飯局上就當然天南地北，無所不談。由於之前幾日開完「市人大政協」，而該內科醫生是政協委員，而我公公退休前曾做過人大。於是大家就講下一d 大陸官場的趣聞la。

(「理論上」，人大會議&政協會議係類似西方國家的 上議院&下議院 (or 參眾兩院)。
政協是招攬各界人士「參政議政」，也可以說是龍蛇雲集，因為政協委員來自各行各業各階層。會上由委員提出意見或動議，然後「投票」通過。通過後的議案會提交人大會議審議。
人大委員多數是政府人士，或者是區內有名望的人。人大審議政府施政報告，並「投票」表決政協提交的議案)

內科主任先講政協的「開會盛況」。她說政協委員好多都「唔乖」，因為會議舉行的幾日，總會有一部分人缺席。缺席的政協，大多數是企業大老闆，點解呢？ D老闆個個都顧住d 生意，邊個咁得閒同你坐係度開政協ar~~ 所以老闆們都會「公幹出差未返，因而請假」。不過，有d 老闆都幾乖，肯排排坐開會，但佢地個mobile 就從開幕到閉幕都一直響個不停，於是佢地行出去傾電話的時間，仲多過坐係度的時間。

至於其他階層的政協，都好乖咁坐哂係度聽動議。有d 乖到雙手放在腦後、閉上雙眼、嘴巴張大，發出呼呼聲響，細心咁聆聽周公講解動議。

好啦，到左最具象徵意義的「投票」時間，由於政協們都希望辦事效率能提高，可早日完成會議番屋企，於是大家都心知 在座的所有政協都沒有反對票，於是都以「拍手通過」作為投票結果，動議成功呈上人大，市政協會議「勝利結束、圓滿閉幕」。恭喜恭喜~~

由於我公公曾任三屆人大，於是佢就講下緊接的 市人大會議的盛況。人大會議與政協會議是兩個不同的世界。由於人大委員都是幹部出身，故會議氣氛相當嚴肅正派。位位人大代表都目不轉睛、面色不變地 端坐在座位上 凝望著主席台，全程鴉雀無聲，唯獨在鮮花擺設前的 書記級幹部 一直大聲朗讀其施政報告。之後輪到審議政協提交的動議，委員長在鮮花襯托下 接捧朗讀動議；座位上的人大，部分一直細心閱讀桌上的動議文本，縱然文本有時成幾十頁咁厚，但部分人大全程只會細心分析第一頁，可能佢地要逐字研究第一頁內容，於是全程未翻一頁。

委員長朗讀完畢後，就進入全場最高潮的時間︰決議投票 la。由於人大係政府的民主機關，所以投票要逐票點算，唔可以拍手代替。投票有乜咁高潮？因為當大會宣佈「投贊成票的請舉手」的時候，全場忽然 眾手屹立，壯觀非常。點解係屹立呢？拿，屹立者，不倒也。因為人手點(手)票需時，所以人大眾手都要長時間舉起唔放低，咁你話係咪「屹立不倒」呢？好啦，漫長而神聖的點票完成後，大會再宣佈「投反對票的請舉手」。可能大家舉手舉到累，於是投反對票時有心無力，想舉都舉唔到。呢個時候全場再次鴉雀無聲。一段沉默之後，會場突然有把洪亮的聲線說︰「贊成xxx票，反對零票，表決通過」。或者大家隻玉手d 氣力都番晒黎，大家都熱烈鼓掌。人大會議於是在熱烈的鼓掌聲中，通過所有動議，正式勝利圓滿閉幕~~



講完人大政協之後，大家又討論下做幹部的條件。究竟為官要有d 咩潛質& 能力，先至可以勝任呢？(「勝任」讀音，與「升任」一樣)
有政治抱負？ 嗯，其志可嘉，送你獎狀一張
愛民如己？ 愛民的話，咁不如做d 低層次的職位，可以親近人民
有治理才能？ 咁就好好留守原來崗位，為人民服務，無須升職

原來要勝任幹部，只係一字咁淺︰「酒」
識得與同事飲酒，就可以合作愉快，何樂而不為？
識得與企業老闆飲酒，就會有多d 企業進駐、投入更多資金，帶動經濟增長
識得與上級飲酒，撥款申請就容易批出，用於基建，同時建設私人經濟
識得與更上級飲酒，就可前程萬里、官途光明

所以為官者，心腹須能容下吞天地之酒量~~ 切記切記