今日去見工 因為屯門公路有交通意外
排左成半粒鐘先有巴士 好彩個時只係微熱
如果唔係企咁耐 中暑都似

巴士終於黎到 都估到會勁多人 幾驚無位坐
唔係又要企成個鐘
一上到去見到橫排有個位
即刻坐上去 後來陸陸續續有人上
我個位前面已經企滿人
其中有兩個女仔 由上車講到落車
都唔知佢地係咪成個暑假都未見過
由學校既八封 邊個皮膚白裡透紅
邊個遠睇既皮膚好 近睇就差到嘔
跟住又係度講入綠社好 個度有咩咩咩人
又討論邊間電訊供應商收得好
又有咩優惠 咩send個message網中人都要收4毫子
咩等住份糧交手提費咭數
係咁傾 途中我望過佢好幾次
唔知係唔係我眼神唔夠勁
佢地一d都發覺唔到

到見完工去坐地鐵
點知又俾我撞到三個八婆
有一個真係口賤
起初我都無留意佢地講咩
後來講到咩用個百幾蚊就去咁遠既地方
講到錢 我就開始留意佢地
原來佢地講緊個菲傭
八婆一號話一返到屋企 個菲傭笑咪咪咁講有人俾左生日利是佢
八婆一知道菲傭係想要利是 跟住又話唔俾唔得
最後都俾左 話如果因為封利是令佢態度好d都無問題
但最弊係佢手勢唔好 成日都唔記得做野
跟住個句 我聽到真係把幾火
八婆二號話如果佢地係聰明 就唔使打工
咩口氣...一地黎香港打工都係為左生活
如果唔係窮 無人會願意山長水遠黎打工
我真係勁憎佢 持住自己係老細就係度亂咁講野
如果你唔想俾 可以唔俾
話人地為左小小錢就扮晒野
如果係小小錢就唔使係咁同人講
根本就係唔想俾人
但為左面子唔俾唔得 又扮晒好人
俾左就唔好係人地背後亂講
香港就係有咁多無所事事 口又臭既無謂人

最後坐巴士 個阿伯坐係我隔離
中途塞車 佢無所事事係度剪指甲
巴士好靜 相對剪指甲既聲就好大
大佬 呢度話晒係公共場所
你顧下人地好無 你當周圍既人死架

無論老中青既香港人都係咁
你話香港會變成點....

其實我都好無聊下 打咁大篇廢話