教 育 部 　 年 用 咱 的 母 語 寫 咱 的 文 學 ／ 用 恩 兜 个 母 語 寫 恩 兜 个 文 學

臺灣閩南語
教 師 組
小說戲劇 第三名

創 作 理 念
(華文)闡述現代年輕夫婦組成家庭，雖偶有遭遇困難，但是在親情、信仰以及自身的內省下，慢慢解開繩結，朝向幸福美滿的方向前進。
　　女主角秀萍原本是單親家庭長大的孩子，一心渴望母愛，然而等到自己結婚之後才發現，經營家庭並不容易，雞毛蒜皮的事都可能令人抓狂。還好，暑假回娘家住幾天，讓心情沉澱下來；同時劇情橫向發展，隔壁鄰居小孩，年紀小小的，就要經歷許多複雜的問題，若大人願意承擔責任時，小孩子就能做他自己，開展未來。
　　標題「望海」，本意是秀萍思念母親，常去海邊尋求大自然醫治的力量，吹海風、看海浪讓心情得到慰藉。「海」亦可是「宗教」的象徵。最後秀萍和母親一起去看海，是圓滿的結局。

(台文)
【一、麗玲】

　　閣過兩日就是秀萍三十八歲的生日，本來是應該歡喜，毋過對秀萍來講，有一件愛慢慢去適應的代誌，就是伊佮已經和(hâm)爸爸離緣的媽媽生做足成的，毋但(m̄-nā)面貌仔成，連講話、行路佮笑聲攏和伊的媽媽仝一个模子印出來仝款，看著伊的人，敢若親像看著二十年前的麗玲，過年的時，秀萍轉去台南的厝，經過厝邊，隔壁的八十歲阿婆一直叫伊麗玲：「麗玲，你轉來過年ooh，彼个是你的查某囝阿萍，遮大漢ooh！」秀萍聽著真歹勢，八十歲的阿婆毋知影麗玲佇三十八歲的時離緣出去矣，秀萍嫁的時，爸爸嘛無請厝邊頭尾，所以攏毋知影阿萍已經嫁翁矣。秀萍共阿婆講：「我是阿萍啦，這个是我的查某囝。」講煞就tshuā查某囝趕緊行。
　　秀萍毋愛轉去台南，因為伊知影親情朋友只要看著伊就會想起麗玲，有時去別人的店買物件，抑是洗頭，店頭家並無熟識秀萍，但是攏會問秀萍一寡麗玲的消息，種種的原因予秀萍真大的壓力。毋過有一个人無仝，彼个人是麗玲的小叔――秀萍的阿叔明堂，明堂九歲就無老母，伊的阿爸一年後就閣娶，明堂一直到麗玲十七歲嫁入來了後，才感受著母親的親情，因為麗玲將明堂當做自己的親小弟咧照顧，明堂嘛將麗玲這个阿嫂當做長輩咧尊敬。麗玲離緣的彼工，明堂踮兜的亭仔跤跍(khû)一工，規个人戇神戇神，伊的心內想：「已經過身的阿母無可能閣活，麗玲佇我細漢的時，親像老母按呢照顧我，為啥物阮阿爸，欲做這種代誌，逼離緣？」伊真想欲哭，煞哭無目屎，只好共薰點咧一枝閣一枝，解憂愁！所以，明堂逐(ta̍k)擺只要看著阿萍對台北轉來，心內真歡喜，常常叫某，攢(tshuân)一寡好食的物件送去阿萍兜。

【二、永成】

　　早時秀萍的囡仔猶閣咧睏，幫囡仔共被蓋好了後，秀萍共爸爸講：「我欲出去，你幫我顧囡仔一下。」伊拍電話予永成：「我這馬欲去台北，你出來我有話欲共(kā)你講。」
　　對台鐵的板橋站出來了後，秀萍行到頭前的咖啡店，永成佇附近茶行服務，已經先到，佇內面等伊。永成戴ㄧ頂棒球帽，帽仔共伊的面攏閘牢(tsa̍h-tiâu)咧。原本常咧烏陰落雨的天氣，今仔日煞反常難得出日頭。秀萍佇日頭下行過來，除了手內提幾張紙佮揹一个小錢包仔，啥物都無提，伊坐落來了後，並無佮永成對看，永成的薰佇薰khok仔（煙灰
缸）內一直咧著，薰節仔燒甲強欲無去，秀萍將手裡的紙提出來：「我看過矣，你家己來台南佮阮爸爸講！我講袂出喙。」講煞過兩分鐘永成攏無講話，秀萍就開門離開，永成對玻璃窗內，看著離開的秀萍，秀萍的裙佇日頭下、微風中ia̍t來ia̍t去，佮伊行路的姿勢相仝，節奏緊閣清楚，永成已經足久無這款機會看某行路，伊一直看著秀萍入去車站的門才回神過來。

【三、望海】

　　秀萍tshuā囡仔駛車到安平的海邊，日頭炎熱，海風一港一港，海湧ㄧ陣ㄧ陣。秀萍佮囡仔落來散步，翻過埠岸就是沙地，囡仔無來過海墘仔，看著海湧湧起來心內小可仔驚驚，海湧落去了後，伊閣想欲去追。秀萍的心情予這个無私寬容的大海，安tah落來；想起二十年前，麗玲離開厝裡，消息全無，甚至連平時上蓋疼的查某囝秀萍嘛無聯絡，秀萍彼時拄仔好考牢五專，逐擺佮五專的同學做伙出去若有看著大海，秀萍攏會佇海邊大叫：「啊！……」伊的同學ta̋nn開始予伊掣(tshuah)ㄧ趒，後來感覺足好耍，嘛綴(tuè)伊喝：「啊！啊！……」叫煞逐个人心內加足快活。這擺秀萍來遮，毋是欲大叫，因為伊知影，人生的難題，攏是暫時的，伊來遮，日頭予伊氣力，海風共伊惜，海湧予伊心情得著敨(tháu)放，伊對未來閣較有向望！

【四、秀萍的爸爸】

　　日頭漸漸落山，天邊的星已經咧閃爍，秀萍沓沓仔(ta̍uh-ta̍uh-á)駛車佮囡仔轉去厝，伊毋免趕緊欲煮飯，因為伊的爸爸攏會先煮好等伊轉去食飯。較早秀萍猶未嫁的時，大部分煮飯的工作攏是伊咧做，毋過自嫁予永成了後，逐擺轉後頭厝攏是爸爸煮予伊食。秀萍聽爸爸的朋友共伊講：「你爸爸毋甘你嫁遐爾遠，逐擺你轉來伊就趕緊欲買菜煮飯予你食，彼是因為伊真疼你。」較早，秀萍毋捌代誌，攏感覺爸爸真嚴肅，猶閣真愛對伊管東管西，但是這馬伊才深深體會著爸爸對伊的用心，袂輸予遐的做老母的人。
　　「阿公煮的菜真好食，我欲閣貯(té)一碗飯。」秀萍的查某囝安安才轉來蹛三工，逐工食外公煮的飯和菜，食kah面膨皮膨皮，嘛加較大漢，而且逐日和表姊婷婷做伙迌，走來走去運動了後，腹肚真緊就枵矣。「我嘛欲閣食一碗！」婷婷看著安安食遮爾濟，伊的胃口嘛好起來。秀萍的爸爸聽著兩个查某孫仔欲閣食伊煮的飯，心內當然是真歡喜，「來，阿公食飽矣，我幫恁攏閣貯一碗飯。安安佮婷婷遐爾gâu食飯，一定會真緊大漢。」秀萍講：「爸爸，多謝你，明仔載我來煮就好，你毋免遐爾辛苦。著啊，我拄仔轉來的時陣，看著蹛佇咱厝後的阿婆兜門口，停一台bèn-lù的轎車，是啥物人來看伊矣?」秀萍的爸爸講：「彼个阿婆，實在真可憐，毋過這馬算是苦盡甘來。伊的查某囝對美國轉來，講欲將查某囝tshuā轉美國飼。」秀萍講：「家己飼查某囝，真好啊！敢有啥物問題？」秀萍的爸爸那收碗箸，那咧講：「你毋知影，講起來話頭長。」秀萍那洗碗，那聽爸爸講阿婆的故事。

【五、阿婆的故事1】

　　阿婆的大官佇日本時代，予日本警察叫去造路，拄仔好總督巡查經過大路的時，有一隻毒蛇趖(sô)出來，險險咬著總督，阿婆的大官為著欲救總督大人，犧牲家己的性命，予
毒蛇咬死。因為按呢，日本總督就收阿婆的翁婿做契囝，啊毋過「花無百日紅，人無千日好。」，日本總督無偌久就予人調轉去日本，雖然有留一寡仔財物予阿婆翁仔某，阿婆的翁婿因為破病，所有的錢攏開了了，最後也無法度救回伊寶貴的性命。阿婆無法度只好將唯一的祖產果子園賣掉，變換錢財才通埋葬翁，而且賣地的時，有佮買主參詳，雖然地賣掉，伊猶原欲蹛佇果子園內底的厝，到死為止。因為兜無啥物錢，阿婆常在捒(sak)奶母車仔，抾歹銅舊錫咧賣，嘛有收厝內面有幼囡仔的尿苴仔，抾轉去洗，洗好曝焦才提轉來佮主人家算工錢，秀萍佮小弟阿義仔細漢時的尿苴仔攏是予阿婆洗的。阿婆有三个後生一个查某囝，因為條件無好三个後生毋敢娶某攏予人招，唯一的查某囝本來八歲的時已經予人做新婦仔，啥知影伊嫁毋著人，對方十年後共伊放棄去愛別人，生一个查某孫仔tshuā轉來予阿婆飼，阿婆的查某囝無面子繼續蹛庄內就離開，幾若年攏無消息。
　　秀萍的爸爸猶未將阿婆的故事講煞，秀萍的小弟阿義仔佮某心彤就轉來矣，阿義仔翁仔某轉來了後，秀萍就會佮做伙去樓頂照顧囡仔，共囡仔洗身軀、洗衫、款（整理）內底，所以阿婆的故事只有另日才閣繼續聽落去。
　　秀萍徛佇二樓的陽台晾衫，拄仔好會當看著阿婆的厝，伊的厝是杉仔枋釘的，無法度看著厝內的情形，干焦知影內底ㄧ定真狹，大概只有兩坪大，杉仔厝頭前有用紅磚仔疊起來的灶，灶頂面囥ㄧ个鼎，邊仔有破好的柴疊做伙。看起來阿婆毋捌用過瓦斯爐，攏是用柴火咧煮飯燃(hiânn)燒水。杉仔厝的外口就是果子園，園內有種檨仔、弓蕉、蓮霧佮龍眼，秀萍自細漢就蹛佇庄跤，就算干焦遠遠看著葉仔嘛是有法度知影園仔內底有種啥物果子，今仔日聽爸爸按呢講，伊才知影，原來園仔內種遐爾濟果子攏毋是阿婆的，猶閣有，樹仔跤飼的雞仔、鴨仔佮鵝仔嘛攏是別人的。果子園門口停的彼台車已經駛行矣，秀萍共衫晾好猶閣毋入去，徛佇陽台一直想爸爸所講的故事。忽然間，杉仔厝的門開開，阿婆頭毛散iā-iā行出來，這陣已經足暗矣，秀萍無想著阿婆猶未睏，予伊掣一趒，阿婆對秀萍兜的二樓陽台看過去，秀萍掠做家己看毋著，阿婆應該無看著伊，只是睏袂去，起來行行踅踅咧，看會較好睏袂。啊毋過阿婆竟然雄雄開喙講話：「麗玲，恁兜的電火光iānn-iānn（光爍爍），你無禁較細咧，真了電閣害我睏袂去。」秀萍予阿婆驚ㄧ下真厲害，毋敢應半句話，趕緊共陽台的電火禁掉，入去佮囡仔做伙睏。

【六、囡仔拍毋見(phàng-kìnn)】

　　秀萍日時用電腦設計美工的案件，雖然工錢無濟，毋過伊佮台北設計公司的查某頭家真熟，頭家知影伊最近無拄好有代誌，所以攏予伊共案件提轉來做，做好才e-mail予公司，秀萍的才華袂，真濟客戶指名欲予伊設計，頭家嘛真信任伊。秀萍咧用電腦發e-mail的時陣，同齊收著五專學姊寄予伊的e-mail。這个學姊是基督徒，較早佇學校就時常關心伊，秀萍感覺伊人真好，毋過彼時伊無想著欲去教會。這馬就無仝，因為秀萍的小弟阿義仔予人介紹去教會了後，生活有平安，翁仔某相疼惜，予秀萍真欣羨。
　　阿義仔佮某心彤真骨力拍拚，平時上班食人的頭路，歇睏時閣去風景區排路邊擔仔，趁一寡所費想欲儉錢買一間家己的新厝。有一擺去到高雄的蓮花池排擔仔賣草帽仔，嘛順煞tshuā查某囝做伙去迌，因為日頭赤炎炎，草帽仔真好賣，而且閣毋免驚有貨底，做生理上驚有貨底，親像食物袂當囥傷久，超過時間攏愛擲掉，就袂了錢。猶閣有親像賣衫的成本較懸，若是賣袂出去所趁的錢就攏佇貨底，提袂著現金。阿義仔賣的草帽仔
誠有特色，價數公道，款式真濟；有傳統的型，嘛有改良的會當褶起來的，人客加減攏會買轉去家己用抑是送人。
　　就當阿義仔佮心彤咧無閒賣草帽仔的時陣，的查某囝婷婷看著風景區真濟人客，猶閣有賣其他物件的人：親像有賣棉仔糖的、賣汽球的、賣枝仔冰的……，遮爾濟人攏佇蓮花池邊仔的樹仔跤徙來徙去，伊的耳空邊嘛不時出現無仝款的聲「pa-pu！pa-pu！」「燒酒螺！燒酒螺！」猶閣有予囡仔坐的電動火車所放送的音樂「兩隻老虎，兩隻老虎……」婷婷予目睭所看的人佮物件、耳空所聽的聲音吸引，離開父母的擔仔位愈來愈遠，當伊攑頭看佇伊頭殼頂的樹葉仔佮樹枝無仝款，才發覺伊人已經毋是徛佇熟似的所在。天頂的雲，予微微的風吹咧行，的型不時咧改變，婷婷看著天頂的雲變化愈來愈濟，伊知影離開父母的時間愈來愈久，心內開始著急想欲趕緊揣著轉去的路，目屎毋知啥物時陣，已經流出來，最後忍袂牢就大聲哭出來！

【七、教會】

　　阿義仔發覺囡仔拍毋(phàng)見就開始揣，揣點外鐘猶閣揣無，就共生理擔收起來準備欲去報案，行到半路伊佮心彤聽著有人咧唱歌，歌聲予的跤步停落來，心彤忽然間將一个徛佇邊仔的囡仔攬牢咧閣一直哭。原來彼个囡仔就是的查某囝婷婷，婷婷聽著有人咧唱歌，家己行倚來，伊的目屎早就予風吹甲焦去，合唱團溫暖的歌聲予伊袂記得家己揣無爸爸媽媽這件代誌，煞顛倒伊的媽媽忽然共伊攬牢咧，予伊掣一下，伊干焦聽著媽媽一直哭，閣一直叫伊的名：「婷婷，婷婷！媽媽惜、媽媽毋甘！……」伊才回神過來，綴咧哭：「媽媽！媽媽！……」在場的人看著這種情形，攏真感動，嘛有人提手巾仔偷偷仔拭目屎。
　　合唱團的指揮是一个慈祥的歐吉桑，差不多有五十捅歲，伊tshuā一陣少年囡仔佇蓮花池邊仔唱歌，伊行過來共阿義仔講：「恁這个查某囡仔真勇敢，本來我想欲帶伊去警察局，拄仔好恁就來矣。」「好佳哉有恁鬥相共，阮才會通真緊就揣著囡仔。恁唱歌真好聽，是對佗來的合唱團？」阿義仔問歐吉桑。歐吉桑予阿義仔一張廣告單仔「阮是對台南來的，阮來遮唱歌順煞迌，這張單仔有阮的教會地址佮電話，恁會當禮拜日tshuā查某囝來教會聽阮練詩歌。」阿義仔共單仔接過來看，頂面的地址離兜無遠，拄仔好佇隔壁庄爾爾。查某囝拍毋見會當真緊就揣轉來，阿義仔感覺真奇妙，伊決定欲去這間教會看覓咧。
　　隔轉天就是禮拜日，阿義仔全家照地址揣著教會，入去的時陣，昨昏彼个歐吉桑指揮咧tshuā另外一陣大人唱歌。阿義仔詳細看指揮的面，生做有一點仔成較早的歌星文夏，只不過歐吉桑指揮的頭殼皺紋加較濟條，伊閣發見這个指揮咧比的時真特殊，完全無咧算拍數，干焦用手畫圓圈仔閣畫線，頭前、後壁、正爿、倒爿攏隨在伊畫，唱歌的人看伊畫偌長就唱偌長，畫偌短就唱偌短；畫偌緊就唱偌緊，畫偌慢就唱偌慢，看著按阿義仔對心底佩服歐吉桑指揮，伊感覺歐吉桑指揮有伊的一套。
　　婷婷愛聽人唱歌，阿義仔愛看歐吉桑指揮，心彤愛綴路，所以全家逐禮拜日攏去教會，做禮拜煞才去做生理。講起來嘛真奇妙，自對全家開始去教會了後，雖然做生理的時間變較少，啊毋過趁的錢顛倒較濟，ㄧ切攏平安順序，所以阿義仔的爸爸並無反對去教會。

【八、生日】

　　秀萍的學姊寄e-mail來祝伊生日快樂，會記得伊五專的時陣，秀萍攏會佮學姊去參加小朋友的暑期夏令營，做伙做輔導課業的「大姐姐」，幫助偏遠所在的原住民小朋友讀冊，拄仔好秀萍的生日是佇暑假，所以夏令營舉辦慶生會，秀萍就會佮遮的小朋友同齊歡喜過生日，時間咧過真緊，五專畢業無偌久秀萍就結婚、生囝，到今已經畢業十五年矣，逐日無閒做穡、照顧家庭，除了結婚第一冬，永成有買雞卵糕共伊慶祝生日以外，根本就無時間通過生日。
　　秀萍共電腦的e-mail差不多攏處理好了後，伊聽著樓跤有人來，安安peh起來二樓叫講：「媽媽！爸爸來矣！伊買一个足大的雞卵糕ooh！」秀萍聽著連鞭將電腦禁起來，tshuā囡仔落去樓跤。永成坐佇客廳，佮秀萍的爸爸咧啉(lim)茶，永成的頭毛剪較短矣，嘛梳較整齊。秀萍對二樓落來的時，伊想起欲講定彼天，伊嘛是對二樓的樓梯行落來，拄仔好行落來兩步，就聽著爸爸咧共媒人婆講：「阮秀萍是五專畢業的，大部分時間攏咧讀冊，毋過有閒嘛會鬥款厝內，遮乖的查某囝欲嫁台北遐遠的所在，我實在真毋甘！」
　　媒人婆仔講：「親家你放心，秀萍遮爾乖，阮ㄧ定會好好共伊疼惜。」秀萍的爸爸閣講：「少年人上要緊就是對家庭愛有責任，毋通有一寡歹習慣，害著家己嘛害著別人。」彼陣秀萍徛佇二樓聽著爸爸按呢講，感覺爸爸有一點仔過份。秀萍會按呢想是因為伊比較較單純，伊毋知影，爸爸已經看會出永成是一个猶閣需要磨練的少年人。啊毋過秀萍的爸爸嘛無法度阻止這件婚事，總是家己的查某囝意愛欲嫁，姑不而將將的婚事辦辦咧，現代的人婚姻大事攏無閣予爸母做主，爸母只好祝福少年人好好仔經營家庭，希望有美好的將來！
　　「爸爸，真歹勢，因為前一站仔行走業務，騎oo-tóo-bài趕時間，予警察翕相，收著較濟張紅單，秀萍受氣走轉來後頭厝，攏是為著我好，我已經知影毋著，以後我會較細膩騎較慢咧，我今仔日是專工來共秀萍做生日，希望伊莫閣受氣；安安，來！做伙來唱歌，祝媽媽生日快樂！」永成看著秀萍對樓頂落來，就趕緊徛起來，共丈人爸會失禮，希望丈人爸會當苦勸秀萍原諒伊。秀萍的爸爸雖然無蓋歡喜，啊毋過俗語咧講：「翁仔某勸和無勸離。」所以伊共秀萍講：「永成知影毋著，你就原諒伊一擺，翁仔某和好，囡仔嘛較快樂。」秀萍頭一擺聽著爸爸替永成講話，感覺真意外伊就無閣加講啥物話，只是偷偷仔共永成gîn一下，永成歡喜佇心內，想講這擺放下男子漢的自尊來秀萍的後頭厝是有價值的，因為閣無偌久，秀萍就會氣消完全原諒伊矣！

【九、阿婆的故事2】

　　「來，安安食雞卵糕，媽媽嘛食一塊，阿公講故事予恁聽！」
　　蹛佇兜後壁的阿婆無才調飼查某孫仔，只好將伊送去孤兒院，蹛孤兒院雖然吃穿無蓋好，毋過至少袂枵著，查某孫仔目睭大蕊大蕊，生做真古錐，巧巧仔，喙嘛真甜，看著人攏會佮人相借問：「阿姨、阿叔gâu早！食飽矣未？」伊佇四歲的時有一對袂生的少年翁仔某真佮意，共伊領養轉去，閣號ㄧ个新的名叫做「志玲」；但是tshuā轉去無偌久，領養的手續猶未辦好，就閣予人送轉來，囡仔已經叫對方「爸爸、媽媽」叫甲足親的，啥知影會予人「退貨」，講起來真使人同情！院方無可奈何，除了一直安慰志玲，嘛袂當強逼彼對少年翁仔某按怎，萬一囡仔佮袂合，若是予人苦毒閣較害。好佳哉志玲个性活潑，愛佮孤兒院的囡仔做伴迌，真緊就袂記得這件代誌。
　　志玲較大漢咧讀小學二年的時，閣ㄧ擺有人來孤兒院看囡仔，佮意志玲做的查某囝，這擺孤兒院較慎重，確定對方攏將領養的手續辦好，才予共志玲tshuā轉去，毋過這擺志玲除了愛改名號做「家芳」，猶閣愛轉學去別的縣市讀冊，離開伊所熟似的環境，綴新的「爸爸、媽媽」過新的生活。
　　去到新的學校，伊的老師真緊就注意著家芳是一个真巧的小朋友，伊真愛佮同學做伙迌，但是作業時常會袂記得寫，為著按呢就毋敢來學校，逃學的情形愈來愈嚴重，學校的老師去兜做家庭訪問，才知影家芳的養爸母佇厝共伊拍甲烏青凝(gîng)血，實在真可憐，最後老師佮養爸母參詳暫時予家芳轉去孤兒院輔導，養爸母知影家己毋著嘛後悔動手拍囡仔，答應予囡仔轉去，就佇家芳轉去孤兒院無偌久，家芳的親生老母就是阿婆的查某囝忽然出現，來到孤兒院揣家芳，伊向孤兒院表達這馬佇美國有正常的家庭佮工作，想欲tshuā家芳轉去美國做伙生活，家芳的養父母知影了後就成全母女團員，所以昨昏阿婆的查某囝才會轉來看老母。最後這擺，阿婆的查某囝無欲共家芳改名，伊知影家芳號啥物名並無要緊，上重要的是伊欲接納家芳的ㄧ切，任何的優點、缺點、舊名抑是新名，攏袂較贏一个親生老母想欲好好仔疼惜、彌補親骨肉的決心，家芳小可仔的缺點應該會佇老母的愛心管教下面，真緊就改過來，總算是天公伯仔有目睭，予古錐的家芳毋免閣四界流浪！

【十、喪禮】

　　故事ta̋nn講煞，阿義仔一口灶三个人拄仔好轉來，永成趕緊徛起來，佮拍招呼：「今仔日禮拜恁毋是去排路邊攤仔，哪會遮爾早就轉來？」阿義仔應講：「今仔日有一个教會長老的老爸告別式，阮參加煞就順煞轉來，無去排攤仔。」「告別式？去參加告別式敢袂真悲傷？」永成真好奇咧問。秀萍講：「恁坐落來沓沓仔(ta̍uh-ta̍uh-á)講，我來去煮飯。」心彤搶代先行入去灶跤：「阿姊，今仔日是你過生日，我來煮就好，你先用雞卵糕予囡仔食。」秀萍應：「好啦，多謝你，予你無閒！」秀萍用雞卵糕予婷婷食，婷婷佮安安兩个囡仔食煞就佮阿公去後壁的田岸仔散步。客廳賰阿義仔佮秀萍翁仔某咧開講。
　　阿義仔共永成佮秀萍的杯仔斟(thîn)茶，斟好就講：「我第一擺參加基督教的告別式，真特殊。陳長老的老爸是一个退休的醫生，已經九十六歲，但是無啥物病疼，頂禮拜透早佇厝內啉一杯牛奶，坐佇客廳的膨椅歇睏，就睏去無閣起來，厝內的人發見的時已經過身矣，對來講，『死』好親像毋是蓋恐怖的代誌，因為相信有一工大家攏會佇天堂閣團圓。我感覺按呢的信仰予人袂驚惶，心內有平安。」永成無去過教會，伊毋相信有人無驚死，毋過舅仔咧佮伊分享心內話，伊啉一喙茶了後，就罔共舅仔應話：「若按呢講起來咱死以後去到天堂猶閣是一家人looh？」「彼是當然ooh！」阿義仔講。秀萍佮兩个講：「騎車毋遵守交通規則的人，袂去天堂啦，家己愛守規矩毋才有去天堂的門票！」永成共某幔咧講：「對這馬開始，我ㄧ定會守規矩，因為我欲佮阮某永遠做翁仔某！」秀萍連鞭共永成的手掰走：「好矣啦！莫閣sai-nai，我欲去叫爸爸佮囡仔轉來吃飯！」
　　秀萍想起十年前，伊的阿媽過身，佇舊厝辦起盛大的喪禮。這个阿媽毋是親生的阿媽，是阿公後來娶的，因為佮序細歹鬥陣，所以過身的時，序細無欲提伊的手尾錢，共伊的手尾錢總開掉：捐十萬元予學校買圖書館的冊、捐五萬元予育幼院、猶閣賰七十萬買墓
地佮棺材、請道教的司公作法、請佛教的誦經團念經、五子哭墓、孝女白瓊、電子花車、西樂儀隊……若是佮葬儀有關係的，攏差不多有請著，最後閣賰一點仔錢，只好閣請一个孝女白瓊，出山彼工，躼躼長的隊伍，有兩个孝女白瓊，哭聲驚動整个庄仔頭，這兩个孝女白瓊應該感覺這擺的難度較懸，袂使兩个同齊哭，嘛袂使同齊停落來，彼此愛互相配合，才袂有時傷吵、有時閣傷安靜。
　　比較起來，基督教的告別式加較單純，嘛袂吵，閣省錢，予人無仝款的感受。
　　秀萍無偌久就揣著伊的爸爸佮囡仔，歡歡喜喜做伙轉來厝食飯。

【十一、永遠的疼】

　　食飯飽，永成隔日愛閣上班就先坐火車轉去台北，秀萍想欲加蹛兩工仔，無佮伊做伙行，下港的空氣較好，予人頭腦清楚、心情快活。秀萍佇遮設計美工，有閣較濟的靈感，工作完成的速度是比佇台北緊兩倍，而且伊猶閣有一个人想欲見，約好明仔載佇安平港的田園餐廳相等。
　　隔工下晡秀萍佮囡仔來到彼間餐廳，餐廳外口予大欉樹仔遮牢著，入去內面有紅磚仔小路，邊仔有一種改良品種的圓仔花佮雞髺花，雖然是熟似的花種，毋過看起來有無仝的特色。餐廳的椅仔是大箍杉仔做的，外口彼欉樹仔發甲餐廳內底，四界攏有野草芳花發出來，用銅管仔貯咧，好親像野生自然的世界。服務人員先捀(phâng)茶予止喙焦，無偌久，等待的人出現矣，佮秀萍生做一模一樣，只是較加伊的歲。秀萍講：「安安，這是阿媽，趕緊叫阿媽！」安安毋捌看過阿媽，毋過親情是斷袂開的線，伊第一擺看著阿媽，就叫甲足親的：「阿媽！阿媽！你的頭毛足媠(suí)，蜷蜷像芭比娃娃的頭毛！」這个人就是麗玲，麗玲佇囡仔滿月的時陣捌去看過秀萍，後來就罕得見面，攏是用電話連絡。麗玲看著孫仔的喙真甜，嘛想起晟養秀萍細漢的時，秀萍生做古錐閣得人疼。「來！安安予阿媽抱ㄧ下，哇！眞重，阿媽抱無法！」
　　飲過下午茶、食一寡點心了後，就去安平的海邊，散步、吹海風、看日頭落山……。

【十二、後記―十冬後】

　　阿婆的後生做生理有趁著錢，買ㄧ棟販厝，共阿婆接去鬥陣蹛，阿婆活到八十六歲過身，死的時陣伊的後生、新婦佮孫仔攏佇邊仔陪咧。
　　阿婆的查某外孫家芳佇美國讀冊，遐的學校鑑定家芳是「資優生」，連跳三級，十八歲就保送入去柏克萊大學的研究所，轟動一時，美國的報紙攏有牽這个消息，家芳成做教育界的「台灣之光」。
　　秀萍的爸爸受著阿義仔感染，參加教會的老人大學歌唱班，熟似教唱歌的歐吉桑指揮，兩人變成麻吉的好朋友，時常相招去摃槌球。
　　歐吉桑指揮愈老愈勇，tshuā少年囡仔去參加合唱團比賽，得著全國冠軍！
　　秀萍的阿公予細漢後生明堂佮新婦奉待，猶閣有「彭婉如基金會」的老人居家安護義工，幫忙照顧，伊的身體勇建、心情快活，這馬百三歲毋免人牽，家己會行。逐工聽收音機、看電視，有時閣使電動車出去tshit-thô。

　　秀萍佮永成後來閣生一个後生，秀萍的媽媽搬去台北佮蹛做伙，幫忙tshuā囡仔。秀萍的媽媽佮意永成這个囝婿，ㄧ家平安和樂幸福！
　　婷婷考牢大學，熟似讀研究所的學長，學長教伊用台語寫文章，伊共十冬前佇歇熱發生的代誌寫出來，最後婷婷佮學長兩人變做真好的朋友。