萬善同歸
一個食酒過頭，致使腦神經leng7 hou3-hou3，像一隻ia5-a2佇田岸頂跳舞，嘛像一個表演特技的丑a2。一手一矸的晃頭啊，是這個丑a2平捧家己的傢私。
罕有人的跤步佇這行踏，有友自遠方來。財神媽tioh8保庇，毋thang予伊poah落圳溝。
酒醉客行過酸風柳雨，漉膏糜路，渡過黑圳溝，行過重重危險較贏死人行黃泉。手裡提著兩矸晃頭啊，光臨寒舍。想起晃頭啊的滋味，致使我嘴noa7 chhat8-chhat8 tin，tin kah kui 塗跤，險予這位貴賓kap晃頭啊chhu poah 倒。我tioh8緊ka7肖貪的嘴noa7吞轉去，若是予吾土醉去？有影是「吾愛吾土」啊！Che叫豬毋肥；肥tioh8狗。
酒醉客將鏡頭chhiau5 kui pou久：「乾杯。」Ka7我成做滿四個月的嬰啊。提著玻璃做的鹹光餅佇我嘴邊siaN5，嘴裡唸著：「收noa7收離離，明年招小弟。」我用手khau矸啊的內壁，向望khau出一sap啊。矸啊卻是連一絲晃頭啊的氣味攏擠袂出來。
裝肖的。
這件tai7-chi3袂tang3安呢準過。毋ku2好漢毋講當年。也只有ka7伊當做無事處理。
酒醉客無事不登三寶殿。提著一本封面全豆菜芽的冊佇我的「三寶殿」peng2 看。我認為伊學過現今流行的英文kap速讀。
奇怪，甚至有淡薄使我憤慨。我上驚輸。偏偏伊提「書」佇我的「三寶殿」唸。速度真快，佇我變臉進前，伊已經將「書」peng2 soah。
Peng2完了後酒醉客滿心歡喜，踏輕鬆跤步離去。
這本冊kam2是寶典？致使我的「三寶殿」法喜充滿。
有食有行氣，有燒香有保庇。
「財神媽，弟子近來錢水較無，予汝委屈。今日有幸，得到寶典。今日，欲以三叢清香乞求財神媽kap身邊的百尺眼、招風耳。日後弟子若風光chhia-iaN7，必定以三牲六禮相待。並且古色壁畫chhia-iaN7門眉，八卦藻井代替孤請蜘蛛結的網。」
三叢清香佇唸soah了後插入財神媽的香爐裡。Oat8頭看著自己的。Ah。這是東山再起必經的過程。Eng暗koh tioh8抱tioh8冷冷的爐啊落眠。
隔日，tng想欲點香趕走餓（iau）魔。我行到香桶邊才想起已經ka7最後三叢獻予財神媽。Ah，東山再起？
愛神嘛愛人。
雖然吾土昨昏已經用我的嘴noa7洗一遍，但chhia-iaN7門眉袂eng7 chhin3-chhai2。手ng2褲跤pi3起來，四箍lih8啊整理理咧。平靜等待百尺眼傳來光景；招風耳chah來佳音。
這是什麼年月？世道不明，我們這個行業卻是強強滾。店頭是一間接著一間，大集團kap阮這類「私人」企業teh tin7-toe7-chian3。真懷念往過hit個和尚chio2糜che7，tiuN3腹肚皮的年代。
萬事起頭難，守成毋簡單。眾先輩八仙過我的腦海，佇我感慨怨嘆的時，兩位忠心毋棄sak的友志，百尺眼及招風耳轉來啊。
百尺眼將家己的一隻大牛目捧佇胸前，招風耳將家己的耳孔放佇一隻大牛目的兩peng5。寶典的秘密to7安呢開破。
Hit瞑，寶典的用意量其約會使體會。但是戲文內裡全是外國人種的豆菜，讀tioh8真艱苦。好佳哉招風kap隔壁庄代天巡狩瘟神府略啊有交情，調來該府飲過鹹水墨的童生來問。童生kap吾poe3會真久，大概會使理解tioh8這是一本現代人講的保險行銷的冊。
我kap招風感謝童生，童生驚乩身siuN thiam2，趕緊起身辭駕。招風護送童生回府，見伊魂魄回體才轉來。今日真正見識tioh8大集團的實力，實在佇吾之上。吾不該怨天怨地。無人行踏本有伊的道理。大企業對人才培養真正大氣力，連耶穌的「經文」也eng7掌握手中。吾實在見肖。
吾應棄捨古代帝王將相的封建思想。現今是一個民主社會，現代人有權力選擇自己的信仰。臭頭紅武亦成帝王。吾只要掠tioh
世道歹。散赤人越來越che7。當今「聖上」雖是不忍，卻是無能。所以靈感用眾散赤人的力量來濟散赤人的生命。號名做公益。
我對財神婆叩首頂禮，叩請聖安。吾有幸受天照顧予人奉sai7佇chia。本是行到水乾糧絕，若會eng7以公益翻身，重回往過門tiaN5 chhiaN-iaN7，吾必勤修渡眾，齊返無極仙鄉。
會使成仙啥人願意做鬼。Chin2時世道烏氣沖天、混沌不明，百姓啞口壓死囝。欲食飽tioh8拼死拼活，toh來閑工聽吾誦經講道？
現代人啊，道義hat8路邊；利字放心裡。掠做吾是餓鬼、貪財之徒，使吾慨百千。無奈輩份siuN ke7，干taN7是大石用來soeh跤phang7的細石。好佳哉受人奉sai7做有應公。有應公，吾應當有求必應，配合現代人的「紅包主義」，以求人間香煙。向望有一日會使修成正果，藉著更加koan7的神位來渡化眾生。
卯時tu2過，門外炮聲chhi7-chha7叫。炮聲炸出白煙，一直到煙消雲散，cha瞑chah著寶典的酒醉客chhoa7著一名女子，一手晃頭啊、一個塑膠包袱啊再度光臨。吾暫無拍青驚，待看酒醉客有何作為？
原來，cha瞑酒醉客佇chia，lam7-sam2 peng2冊，然後照peng2出來的號碼落注做「公益」。「熱心公益」得到福報。
塑膠包袱裡的mih8件予財神媽kap我的香爐燒lioh。然後阮的金鼎toe3 咧燒lioh8起來。實在樂暢。有影是人teh講的「一人得道；雞犬升天。」
阮飲kah醉茫茫，成無簡單才得tioh8，na2有無醉的道理。 Theng2候阮醒來已經是日頭曝kha-chhng啊。頭重，pin3邊siak8-siak8叫。昨瞑酒氣袂消，soah聽見百尺眼講tioh8昨瞑酒醉客的夫人皮膚胖皮白siak8，身材豐滿。想來奇怪，阮攏醉kah毋知人去？百尺na2 thang 看見伊的阿挪多姿咧？
原來，百尺本是下港來的。佇下港時暫時修行佇濟公壇。聽伊講下港人叩謝神恩攏tioh8粉味。百尺的另外一隻目珠就是siuN chiap8洗。致使目珠洗kah失明。百尺一咧起狂，挖目後悔。就是現主時咱看tioh8獨眼百尺這般模樣。古代
無奈，虎落平陽，寄草的na2有講大聲話的道理。百尺講：獨眼神像使人hiau5疑，信眾掠準是神蹟。Hah！Na2有神蹟。吾目珠有病，挖目斷根。Kap in啥ti7-tai7？
然後，信眾敲tioh8龜殼來見。壇主見tai7-chi3大條，只有將吾趕出壇外替信眾出氣。
百尺講：「吾今日有幸，實在tioh8斟酌行事。萬一行回頭路？萬仗深坑啊。」
這kam2毋是我的憂愁！想當初，「有求必應」四個大字掛佇吾的違章天堂，香客挨挨陣陣。想起那個年代，行路有風啊。若毋是hit個毋知死活的kiau2豬來chia下重咒：「予我tioh8ㄧpai2 我死也甘願。」hit暗，死兩個。一個是伊，一個是吾。有求必應soah狼狽收山。
這pai2，咱真正愛考慮再三，詳細計畫才thang。
一人主張不比三人思量。吾kap百尺、招風na2看na2 ioh8保險行銷寶典了後有感。現代人將阮當作貪財之徒，其實阮na2像一面鏡，現代人將家己的心裡反應佇吾輩身上。招風講：「聽人講隔壁庄大樹公廟熱心『公益』。助人賺錢。當今『聖上』有發聖旨，將大樹公升格做正神。」百尺聽kau3 te3講：「違章天堂改建成做樓中樓、天井，花園別莊。」百尺停睏一時啊，想起往過，然後講：「世間人愛博，吾就來kap in車拼。贏！上天堂。輸？吾前往阿鼻地獄修行囉。」
阮三個心裡暗想，終其尾ui3保險行銷寶典裡得到結論。大石是細沙組成，萬丈高樓也tioh8平地起。吾若以現代人的行銷策略用佇現代人身上必成大業。吾命令百尺、招風吸收天下將才。只要是「無緣鬼魂」攏收入吾有應公。
今日有一塊烏雲kham3頂，毋肯落落來。我kap招風、百尺同聲講：「上天憐憫。」趁tioh8陰暗不見天日，正是召集眾英雄好漢的好時機。招風用大耳聽看kam2有「無緣鬼魂」痛苦的哀叫。百尺雖然獨眼，猶原thiN2孤目尋孤魂好漢。
才半工的功夫，佇百尺、招風拍拼走闖之下，吾已經是好漢三千。Chia-e5好漢自我了斷者佔多數。因為陽壽未盡，半人半鬼佇人間浪流連。Ui3 chia-e5遊魂嘴裡吾koh聽見現代人並毋是吾想的hiah呢熱心「公益」。「公益」是政府做當管，利sun5有限。現代人順風駛船，駛ui3地下樂透，地下期貨，地下職業野球插賭。
莫怪吾會像古井水雞。這類的tai7-chi3攏藏佇塗跤底，連當今「聖上」攏毋知，吾na2會知？佳哉hiong5-hiong5覺醒，koh有好漢三千。這寡好漢佇世間四界求明牌，對吾來講有影是大幫助。吾tng憂愁要怎樣洩漏天機koh無留痕跡？數字對阮老江湖來講算是屑啊。野球插賭、期貨這類阮無khap過啊。
五路英雄好漢集合soah了後有人tai7先khau-siah：「這間破瓦厝na2 thang toa3阮這種大佛？連一柱清香都無？孤目的，汝騙阮？」
英雄好漢私底下chhih8-chhih8-chhu7-chhu7。
各位兄弟，今日感念眾兄弟幫贊，願來此地共同修道。有應公「私人企業」正式改名做「萬善同歸股份有限公司」。佇chia，每一個「人」攏是頭家。只要對公司有貢獻，公司絕對袂虧待逐家。
招風此時趕轉來，掩著嘴輕聲佇我耳孔邊：「瘟神廟同意暫借香火，利息三分，每十天一期。」講kah phiN7-pheN7喘。
利息就利息。這是成就大事業必經的路。
「眾兄弟！香煙來囉！」
未來的日子猶真長，待吾lu2做lu2大，瘟神廟這個步數是阮「萬善同歸股份有限公司」學習的所在。
「人」因為夢想來偉大。吾等若會eng7修成正果，必定報請「聖上」將「公司」掛牌上市，升格做陽廟，接受koh較che7香火的投資。Hit時，吾kap好漢三千必定「萬善同歸」極樂仙鄉。