彼暝，天tu2拍曝光，草枝tu2吐露水。汝來！

Che是我頭一pai2 kap汝見面，汝kap彼張相片仝款面a2笑笑，無話。想欲開嘴的我因為喉滇煞將想欲問汝的話含佇心裡（想欲問汝過得好無？）。幾十年前汝離開的時我猶未出世，若毋是汝彼張佇海坪擔魚栽的相片，我na2會認得汝這個上親的生份人咧。

晚晡時，我來汝出代誌的所在。Phoh a2樹花na2像saN3嘴日光過頭，日欲落西山，烏雲罩半天，伊猶是花嘴開kah離獅獅。油點草tu2-chhai2 suh日光siuN過喉滇，吐著淡淡清芳的氣絲。

東peng5天邊的烏雲欲落na2毋落咧，天也因為安呢老siam真che7。抑若我咧。我看ui3遠遠的海坪，略a2臭黃的天色kap相片的色緻相siang5，彼個擔魚栽的老阿伯遠遠ui3我chia行來。這時的我目屎就像雨水欲落若毋落含佇目墘，kam2講這幾十年來汝猶原kap汝出代誌彼日仝款的心情？一直掛念著厝裡大大細細kam2有thang食。

阿媽tiaN7-tiaN7講起汝。咱莊裡老一輩傳落來的彼句：「做山有一半，做海攏無看。」生性樂暢的汝tiaN7 ka7阿媽講無看的才是寶，山干taN7予咱一半。海予咱的是看無的全部。雖然講行船走馬三分命，豬食狗睏毛蟹行。靠山食山，靠海食海，只要肯拍拼無看的變有看。

我一直會記得阿媽講汝對伊講的上尾一句話：「欲去，烏影；毋去，吊鼎。」汝為著kui家的全部拼性命。誰知船過水無痕，做海有影攏無看。連汝最後的身影。

汝行oa2來，ka7魚栽hiat8佇沙坪：「擔魚栽，歹放屎。先ka7 khng3咧較好講話。」汝講照咱人的古例汝無應該來的。但是母a2後頭厝的人袂輸墨賊花枝，無血無目屎。汝才會尋我這個外孫幫贊。

聽阿媽講汝的屍體有尋到。入土猶未幾年，表兄煞來得病過身。大舅a也敢是袂kham chih傷悲，怪東怪西，怪入土的毋是in 阿爸。然後甘蔗整支khoe3，無嶄無節。也無經過阿媽的同意就ka7彼具屍體遷ui3大眾爺廟。阿媽tiaN7-tiaN7念講就算是為死狗做墓，罔安慰在生的人嘛好。誠無簡單心靈才有寄宿的所在，如今煞墓做大水，使人失望。行船掠魚煞予海龍王掠去，予海水淹死就真歹命a，chi-tma2 koh tioh8做一pai2風湧。

阿公對我講：「在生的，kiam2-chhai2比死的koh較艱苦。」阿公講阮活佇世上為tioh8生活三頓走闖有夠辛苦a，煞也tioh8為tioh8死去的人煩惱，伊真歹勢。

阿公，汝kam2也是為tioh8 kui家的三頓毋願逐家iau飢失頓才來失去性命。Chin2做世細的有機會替汝做寡代誌，彌補袂赴的友孝。汝na2 thang歹勢。

我真想欲ka7阿公講汝留落來的是生活的記持，生活的滋味。若無汝，阮kam2 thang來這個世間？若無汝ka7媽媽講毛蟹糜安怎煮，生活na2有hiah呢甘甜的滋味。若無汝，kiam2-chhai2阮的生命就有欠點。若無汝，阮的人生無定tioh8是破相的。汝na2 thang講歹勢咧！毋ku2阮毋知欲安怎講出嘴。

阿公一直到死攏猶teh為阮peh腹，做世細的在生無kah一粒豆奉待伊。Chin2有機會彌補阮的不孝，阿公煞驚攪吵阮的生活，驚阮無方便。

汝來，只是看看咧？汝有啥代誌愛做世細的阮幫贊？汝來，煞因為歹勢阮為汝操煩。汝來，煞無聲無息離開。像幾十年前安呢。汝來，kam2 thang予阮知汝佇hia過得好無？

當我欲將心內的話講予阿公聽的時，天邊彼片烏暗唐突間落落來。眼前的畫面像一張予水浸澹的紙，阿公的身影予暴憑的雨沃kah澹糊糊。漸漸iuN5去。然後，我予一港濕熱的目屎燙精神。

精神了後，喉滇的阮只有將話khng3佇心肝內， lian3著目屎一直到天光。