元宵有一項真趣味的活動就是猜燈謎。

燈謎範圍真闊，上自天文下至地理，古今歷史、名人軼事、甚至四書五經、野史攏會當做成謎題來猜。

這是一種拚腹內考內才的活動，真趣味擱真鬧熱。

暗頭仔去鑽燈跤轉來，大家泡茶開講的時袸，阮迄咧嫷某講買出謎猜乎大家猜看邁。

伊進前去兒童班上課有抄一掛題目，準備買來考阮迄二个外甥仔。

伊呣知影，阮迄二个外甥仔已經唯網路掠真濟題目，準備買甲伊車拼一下。

「十五天，猜一個字。」阮媠某題目拄好唸煞，答案已經應出來「胖！」

「九十九，猜一個字。」

「白！」阮外甥仔想一下，答案嘛是隨出來！

國語考人袂倒換英文「如果在我們中間！猜一個單字。」

這題是有一點深度喔！普通時ABC狗咬豬真敖講，猜謎煞喙開開想半埔！

大漢仔去扎電子字典，點一睏嘛無結果！

這聲換阮嫷某得意洋洋，總算有考倒人的時陣。不過，上佳哉是阮後生已經去睏矣，那無一定洩漏謎底予阮外甥仔知影。

謎底到底是啥？最後阮嫷某講這是一種名詞叫作「Wife」嘿！真正是無好臆！

換阮外甥仔出題囉！

「油炸臭豆腐，猜兩個人名，一位是唐朝名人，一位是三國人物。」

大家猜半埔攏無結果！這个時陣做大舅的我已經準備欲出手囉！

「一个叫作李白，因為臭豆腐內面是白的，國語講「裡白」所以國語讀作「李白」，臭豆腐外表是黃色的，所以三國人物叫作「黃蓋」！」

呵！呵！呵！阮母仔講：「大隻龜出手果然不同凡響！」

「那欲窮千里目更上一層樓呢？猜一成語。」阮外甥唯電子字典，揣題目來考我。

這嘛冇難啦！謎底是「高瞻遠矚」哈！哈！哈！擱有嗎？

換我出一題大家參考看邁！「頂通下不通，下通頂不通，呣通頂下全不通，買通頂下攏總通！這買猜四字。」

猜謎若臆袂出謎底，彼咧場面馬上就冷落來，袂熱場著無心適佮趣味。

看大家面無表情，我趕緊宣佈謎底是「由、甲、申、田，四字。」這題是唯阮外甥的資料看著的，換作台語講煞考倒提供資料的人。

閣出一條，「十二月天睏厝頂！」拄講完，阮母仔煞洩漏謎底講是「凍霜。」

好罷！閣出一條「二面四角六齒七面，猜一項日用品，毋是神奇寶貝喔！」

這聲厝味來呀，日用品生做遮奇怪，逐个攏搖頭想無！

我講：「愛用台語唸，重點是六齒七面！」

阮母仔拄好欲閣洩漏謎底的時陣，大漢外甥仔講：「好像是擦臉．．」

果然無錯！是七面！七面國語是擦臉！

謎底是面巾！一條面巾四四角角有二面，「六齒」是拿起，拿起擦臉叫作『六齒七面』所以謎底是面巾！

既然安呢會通，逐个題目一直請出來。

『四分五裂』叫作『九份』。

『金字塔』叫作『鑫』。

『朝鮮郵件』猜『韓信』。

『千里隨身不戀家，不貪茶飯不貪花，水火刀兵都不怕，日落西山不見他。』這是啥？

謎底是『人影』！

大家愈臆愈熱場，有步數盡展連『武昌起義，推翻滿清。』攏出現，這買猜啥？

結果謎底是『撲滿』。

最後我出一題「天上的尿壺」猜一句成語！等我唯便所轉來，閣無人知影謎底！

我講：「天上是神咧活動的所在，天上的尿壺當然嘛是，攏神底用的！」

講甲安呢，猶閣想無！好罷！用台語唸一句看覓『全～神～貫～注』！

有道理無？天上的尿壺當然全是神咧貫注，所以謎底是『全神貫注』！