9月7日，係我o係星輝實習期滿o既曰子。再唔願意，呢日都係要到。

lunch食飯o個陣，雖然我知道呢餐飯係志在同我攪farewell，但係諗都諗唔到有好多平時唔出現o既同事都有o黎一齊食飯，一樓o既benny啦、霍生啦、魏生啦，連阿may、阿聰都o黎埋，估唔到我呢舊small potato都幾有號召力！

食完飯，我開始執自己個櫃桶，唔知點解，個櫃桶都唔算多o野，但係我都執得特別慢，每樣o野，即使係之前隨手攞o黎take notes然後塞入櫃桶o既紙，我都將佢攤看，睇o左好耐。

呢個時候，田生走o黎同我講：咦？開始執櫃桶喇？求其執下咪得囉，個位留番俾你，等你隨時返o黎都有得坐嘛！

其實我知道即使過o左實習，只要我開口問o既話，我好大機會都可以留番o係o度做，個分別可能只係開學之後繼續做，定係畢業之後返o黎做。不過聽到田生咁講，個心依然覺得好感動。

跟住，gary走過o黎提醒我，叫我記得搵田生傾之後返工o既o野，(超感謝gary一次又一次咁提醒我要把握機會！)本來我諗住等田生得閒少少先走去同佢傾呢o的o野，不過諗諗下，佢基本上係唔會有得閒o既時候，依家唔開口講，真係唔知仲會唔會有下次，於是點唔好意思都好，都截停咗行出行入o既田生，問佢返工o既事可以點樣。

田生o既答案都係我意料之中o既，不過得到一個咁明確o既答覆，始終都令人雀躍。當我好開心咁返埋位時，見到我個位o度多咗張卡，一打開張卡，見到同事o的簽名，已經忍唔住要喊。事後gary問我覺得邊句最感動，我真係答唔出，因為感動o既，唔係裡面o既內容，而係我見到每個同事o既名都出現o係張卡度，單係呢份心意就已經夠喇。

9月7日，我o既實習生活正式完結;9月7日，我有一個新開始。新o既學年、新o既 life experience，一切都令人覺得期待！

相：capture咗部分公司男同事o既真跡，再一次印證男人寫字必唔掂o既定理。