我有一個大我兩年o既大佬，一年前，佢o係屋企最困難o既時期飛o左去美國做o野，今個星期一，佢返o左o黎lu。

o係機場見面o個一刻，無預料中o既激動場面，心情竟然出奇地平靜，大佬就好似無離開過咁，o個段令全家陷入谷底o既日子好似從來都無出現過，唔...就好似一個長達一年o既惡夢，依家大佬返o左o黎，個夢亦係時候醒。

o係呢一年裡面，我有一刻真係好憎佢。憎佢做乜要離開我，等我自己一個去面對人生裡面最大o既逆境。我o地好多o野都係一齊分。一齊食一個牛排鐵板餐、一齊打機、一齊俾老豆打、一齊離家出走去商場玩、然後一齊上差館...好o既唔好o既，我都有大佬同我一齊分一齊面對，突然某一日，佢同我講話要去美國一年，叫我點接受到？

但係一年過去，我反而要感激佢俾o左一年時間我睇清楚自己。由細到大，佢o既角色唔單止係我大佬，有時佢比我老豆更似老豆。以往o係佢o既保護下，我以為生活可以好簡單好容易。佢唔o係度，無人煮飯俾我食，無人煲湯俾我飲，無人幫我捉曱甴，無人話我知條路應該點行; 佢一走，我要學識點去買菜煮飯，要落手落腳學煲湯，曱甴要自己搵殺蟲水去噴，條路點行都要靠自己o黎判斷。明明未想長大住，但係呢一年自己真係長大o左好多...

所以，依家望番轉頭，佢去美國係一件好事，知道佢見識o左咁多，我都為佢感到驕傲，更加慶幸o既係，我大佬依然係我大佬，佢無改變到。