老實講，我個人真係幾失望。

究竟出情色版，係有咩意圖？一個個亂倫、人獸交0既訪問問題，
你敢講唔係博人注意嘩眾取寵、或者想玩下野出位下？

如果真係以「讓學生公開談性」為初衷，點解編者冇0係前前後後加0的引言或者後記引導讀者思考？你0既目的真係咁正面？定係純粹娛樂？

如果係大學學生報，我冇預期內容會咁膚淺0羅，睇呢0的內容，我何不去買本便利？當你真係諗住做「公開談性」，目標正面，堂堂大學校報編輯，用咩手法俾呢0的內容順利出倒街，我期望你y識得審慎行事考慮後果。咁敏感0既性討論，加一兩句編按「導人向善」，就可以少好多麻煩啦，乜得你咁失策呀？

同中大校方對壘係唔少得，不過硬碰硬咁激動有咩好結果呢？
做得報紙就係以讀者為先，既然口口聲聲自己冇錯，
何不搞個民議調查，如果人人都話你冇問題，就理直氣壯拍檯談判去也；
如果連中大學生們都唔同意報導手法，未衰衰地認個低威，起碼有個落台階。
而家你有你嘈，讀者有讀者睇鬧劇，明明出報本為讀者，而偏偏冇考慮讀者意見，大佬，個方向有冇錯左？

最失望最失望之處，係睇渾曬0的報導，中大學生會或者代表會竟然冇出聲！
所謂有危必有機，咁大壇野，如果領導學生0既學生會同管理活動0既代表會處理得體體面面，人地會更加相信大學生有自治能力，更加佩服學生領袖們0既才能同熱誠。

0既然係學生報出問題，大家都係「為學生服務」，唔係應該更關注事件、加緊回應、同學生報溝通、表明立場、好好利用學生賦予0既權力咩？平日就圍威謂，有起事上黎就扮行過扮唔識、做鴕鳥，感覺上真係有0的揸流攤0羅。

或者我係局外人，旁觀者講乜都得，不過一諗到，一個培育知識份子0既地方，入面0既學生中出左一0的咁0既人咁0既事，再聯想到當今香港官員0既共通點：

．做事唔審慎周全、唔小心考慮後果
　＞＞＞校報報導手法ｖｓ某前財爺偷步買車

．有錯唔認，打唔企定
　＞＞＞大義溧然維護言論自由ｖｓ沙士應變

．有事唔出聲唔回應
　＞＞＞學生會代表會ｖｓ七一遊行之後句「早晨」

然後再聯想下香港0既未來同各未來社會動樑，
唉，你都咪話唔唏噓。

當然，唔係話全部大學生都唔掂（我都係準大學生哎），中大校方處理手法亦不見得高明大方有效冇錯，學生報亦唔係一面倒錯曬，不過，睇倒咁0既事，做學生（大學又好中學又好，總之有思考能力0既學生）0既我地係時候反省一下！