03-06-07

安老院舍，我又返嚟啦！

話說安老院同事浩民行街果時唔小心整親隻腳，仲要係裂咗骨，睇嚟有排都返唔到工，所以梁姑娘叫我返去幫手。其實就唔係好想架啦，因為成個星期返工，放假都要替更？真係好辛苦架！不過之前兩個WW同事梁姑娘同吳姑娘對我都好好，而家佢哋要人幫手，拒絕佢哋都幾衰仔，所以都頂硬上啦！！

因為安老院得三個WW，浩民放病假，星期六同星期日梁姑娘或者吳姑娘其中一個就要返全日，等另外一個放假。全日好難捱架，我以前都試唔少……

其實返到安老院，都唔係有咩好做，因為我唔會晌到跟case，提議過搞啲單元活動(例如係玩小遊戲)，梁姑娘都話唔駛，因為習慣上星期六同星期日都唔搞活動嘅，於是返到嚟我就光明正大、大條道理咁去做自己中心嘅嘢，中心嘅嘢做晒就全日MSN，所以呢輪成日可以上網同人傾計。

不過，因為我要求返早(7:30AM-3:30PM)，所以差唔多日日都要好早好早起身，但係夜晚唔知做咩訓唔到，要一點先訓得著，所以成日都好眼訓，雖然返到中心都夠精神做嘢，但係日頭唔想起身嘅情況越嚟越嚴重，晌車上面又成日訓過站，睇嚟年紀真係大，唔可以捱得耐啦……

聽講浩民已經開始返工，但係又到吳姑娘整親……唔知我嘅替工生活過咗今日之後仲會唔會繼續呢？