15-05-07

今日係保記安老服務一年一度「業務會議」嘅日子，作為中心嘅社工，開呢啲吹水會都係我嘅工作之一，於是今日9:30-5:30都係晌總局，聽唔同嘅中心報告業務同來年計劃。成個會勁超時，仲要有啲不知time control為何物嘅IC，晌overrun嘅情況之下都原原本本完成整個present，無視台下嘅人嘅不滿，搞到放lunch同放工都遲咗(仲要冇OT計，what the fxxk……)

原本打算去南記食一碗好好味車仔麵，但係去到已經冇晒位，惟有去另外一間餐店。晌冇咩認識嘅情況下去咗一間「香河越南餐廳」 (見圖)。入到去梗係想食越南最出名嘅香茅豬扒，個侍應寫「香茅排骨」，仲話佢哋嘅豬扒即係排骨。而我就叫咗一個凍幪粉。

點知上菜嘅時候，侍應拎嚟嘅竟然係一碗米粉！仲要係冇拎埋啲加落去嘅醋，於是出現以下對話：

我：「阿姐呀，我要嘅係幪粉窩！」

侍應：「係呀！呢個咪係囉！」

我：「呢個係米粉嚟架窩！」

侍應：「呢個係幪粉呀！幪粉係咁架啦！」

我：「唔係掛？幪粉係咁，你以為我未食過幪粉呀？」

侍應：「我哋嘅幪粉係咁架……」

我：「咁你就唔好寫幪粉啦，明明係米粉嚟……」

侍應：「我哋嘅幪粉係咁架……」

我(開始火滾)：「咁我可唔可以拎張偽鈔俾你話我係咁俾錢呀？」

侍應：「我哋嘅幪粉係咁架……」(邊講邊行開)

真係不得不頂佢個X，講嚟講去都係一句「我哋嘅幪粉係咁架……」結果呢餐晌好氣頂嘅情況下食完，得出嘅結論係「三十幾蚊食碗垃圾」，仲要八個人一齊去對面麵包舖買麵包……

各位，為免再有人被騙，我特登將上述過程公開，請各位如果去到銅鑼環波斯富街，千祁要小心呢間「香河越南餐廳」！以免得到同我一樣嘅遭遇！同時將呢個信息傳開去，以免更多人受騙！