10-04-07

五日假期轉眼就過晒……但係我仲未反夠吖……

5號，第一個假日，晨咁早起咗身。其實我都唔想咁早起，但係慣咗就好難訓得晏。尋晚臨晌卡巴拉島開咗兩個角色自動鑽地，得到嘅經驗值竟然夠一個角色升咗五個等級(35→40)，一個角色升咗兩個等級(107→109)，睇到我都呆晒……咁我之前做咩要升得咁辛苦？
十點幾去咗California做gym，可能呢輪做得太密，肌肉都未回復得切，好快就好攰。但係呢個時候去有個好處，就係唔駛等，因為好少人。結果好快就完成今日嘅訓練，食完lunch又返咗去卡巴拉島。

6號，約咗輝爺去睇玩具展，食完lunch兩點去到，門口啲「實Q」話要等三個鐘先排到隊入去，咪玩啦三個鐘……排得嚟都閂門啦……惟有走人啦(好彩冇去，第二日睇報紙先知呢個展覽劣評如潮)。
結果晌灣仔模型街行咗一轉，上次嚟我開開心心咁買咗一set新BB戰士走，今次兩手空空而回，加上滿腔懷念同惆悵……
夜晚約咗中心舊同事食飯，人就係少啲，但係都算啱嘴型，所以都好愉快，如果晚餐完後有一杯fullcup嘅超甜朱古力就更好，可惜大家都有節目，惟有返屋企啦~~~~

7號，返工。五日假期嘅中間，搞到想出去旅行都去唔成。原本我係5號返工，跟住連放四日，但係同事要返鄉下拜山，6號就唔晌香港，所以同我對調，變咗我今日返工。滿懷大志清晒平日值壓嘅工作，點知個電話全日不斷咁晌，好多突發事要處理，搞到咩都做唔到。結果今日返工俾人串……火大！！ ( __/ #)

8號，去咗拜山，冇咩特別，年年都係咁去……

9號，約咗比比同大霸出嚟食lunch，佢兩個都係我晌卡巴拉島識嘅friend，當年卡巴拉島入面有邊個唔識我哋「天天練功團」？我就係呢個團嘅三軍司令，比比、大霸、小琳妹子(晌game入面佢叫花花)同蜜可可，就係呢個團嘅「四路元帥」，堪稱團中嘅骨幹，可惜蜜可可晌上海公幹嚟唔到，結果我哋四個聚。食完lunch又唔想返屋企，結果去咗唱K，花花話大霸想做歌星，唔怪得之佢有呢個志願，因為大霸唱歌真係好正，佢嘅國語亦好好，喂大霸，考慮吓參加新秀吖……
唱完K比比話去茶餐廳食晚飯，一人叫一個小菜，一碗白飯，飯後仲有糖水送，鬼咁溫馨^_^各自歸家之後晌卡巴拉島再聚集去打會戰，雖然俾輸足九條街，不過「天天練功團」好耐冇試過咁齊人打會戰，所以雖然係輸，但係都玩得開心。