28-03-07

識咗個新朋友(高小姐)，傾咗一輪電話，佢開頭話自己做零售，今日同我講有個seminar講開展商機，問我有冇興趣，諗住放咗工無野做陪陪佢都無妨，點知上到去先知原來佢係做直銷(定傳銷？我都唔清楚，總之都係嗰啲啦)，仲要係好勁果個，因為公司入口放咗佢張相……一場嚟到，就咁走咗去好似唔係咁好，於是就聽吓啦。講seminar果個男人真係好勁，自信、口才都係好好，亦好識搞氣氛。講完之後就梗係勁sell你入會、買嘢同join佢哋team啦。雖然高小姐、佢partner同佢上司三個好似「三英戰呂布」咁車輪戰，但係我都冇應承佢哋(大家可以放心，經過上次California一役，我唔會再join任可program)。但係今晚都俾咗我唔少反思。

第一，高小姐同佢partner們都好有鬥志同行動力，直頭可以同小說中嘅涼宮春
日媲美，佢哋為咗目標真係好努力咁做。講真如果我嘅行動力同決心可以有佢哋一半，我相信我跟case嘅效率一定會比而家高好多。

第二，佢哋嘅觀察力比呢個做社工嘅我更強，睇住我嘅打扮、衣飾就講我嘅性格，可惜嘅係佢哋只睇表面，例如見我戴住黃水晶同白晶，就以為我想有橫財同心想事成，無諗過我原來只係求其戴……不過都係果句，如果我有呢份觀察力，我應該可以發掘到更多client嘅needs。

第三，我相信直銷、傳銷呢啲，絕對有佢哋嘅市場、存在價值同發展空間，我亦唔會戴有色眼鏡，覺得做呢行就係「出賣朋友」、「搵人笨」，好似我今次，決心大過佢哋嘅佢哋一樣奈你唔何，我亦唔覺得有咩損失，只係夜咗返屋企、打少咗機，但係我總算知道多咗晌社福界以外嘅世界，因為從第一份正職開始，我就晌社福界，根本就唔知外面係點，所以今晚都算增長咗見識，對我寫小說都有幫助。

第四，亦係最重要嘅，我雖然好想搵多啲錢，等屋企人同自己過好啲嘅生活，但係直銷、傳銷呢啲，絕對唔啱我，因為我冇咁好心機去說服人哋去buy我嘅product，亦無咁強嘅鬥志、行動力同觀察力，雖然我知道自己只要肯做，我一定做得到，但暫時未係時機，因為我仲好鍾意我嘅career，我未有需要去改變，所以我一定唔會入呢行。當個朋友就可以，要我買嘢同join佢哋team，thank you啦。

所以，大家，唔好以為我入咗會，以為我sell你買嘢，就唔聽我電話呀！！>_<