02-03-07

最近晌卡巴拉島見到兩個遊戲人物，叫「涼宮春日的暴走」同「涼宮春日的嘆息」，好奇之下問小琳妹子咩係「涼宮春日」？點解突然咁hit？得到嘅答案係「日本嘅輕小說」，雖然唔知咩係「輕小說」，但知道唔係漫畫，我就有啲興趣睇吓。斷估咁新嘅書圖書館都唔會有得借，於是我好冒險咁作出一個決定：買晒返屋企慢慢睇！如上圖，八大本，封面仲要好似漫畫咁嘅小說。

返到屋企開咗第一本嚟睇，又真係幾好睇，抵個作者得到小說獎。綜合讀後感，呢套小說天馬行空之餘，亦有其科學及哲學根據，並非一味靠「吹水」，而且都唔係好難明，仲寫得幾好笑。第一本已經令我沉迷到訓覺時間都推遲，其他嘅都唔知會令我捱多幾多晚夜@@

不過已知嘅係，睇完第一本，我已經開始想拎起筆，正正經經咁寫返嘢──唔係「我手寫(打)我口」嘅網上日記式廣東話，而係晌原稿紙上、一字一句都係正統書面語嘅文章。