19-01-07

模型界中有一個傳聞：逢係名字中有個「龍」字嘅BB戰士模型，總會係特別有型、貴同埋少貨，例如之前我用$310 bid返嚟嘅「龍頑駄無」、我以$350賣出嘅「輝龍頑駄無」、由$150炒到$350一set嘅「白龍頑駄無」、「青龍頑駄無」同「赤龍頑駄無」，仲有等咗好耐先返貨嘅「龍將飛將」─即係今日嘅主角。

話說舊年已經聽到呢隻「龍將飛將」會重出，果時已經好期待，一來好似上文話齋：有個「龍」字嘅BB戰士模型總會係特別有型；二來呢隻係奸角，BB戰士好少出奸角之餘，好少有用「龍」嚟命名，所以今次我收到消息之後都好留意，幾乎係每星期都去旺角行一轉。點知等吓等吓，都係唔見旺角有得賣，相反yahoo拍賣場就越嚟越多人放，雖然唔駛四圍搵，但感覺上總係俾人炒高個價，所以都係諗住睇定先。

上年年尾，終於俾我晌藍田見到呢隻「龍將飛將」，果時諗住晌旺角買會再平啲，點知搵咗三個禮拜都唔見，好彩今日去咗藍田開會，臨走再去望吓見唔見呢隻「龍將飛將」，哈哈~~仲未有人買，拿拿聲買咗返屋企，免得日後買唔到又後悔~~~~